იმის გათვალისწინებით, რომ ფრანგების 61% მხარს უჭერს მაკრონის გადადგომას და 50%-ს სურს ეროვნული ასამბლეის დაშლა, ახალი არჩევნები პოლიტიკური კრიზისიდან კარგი გამოსავალი შეიძლება იყოს, – ამის შესახებ საქართველოს პარლამენტის თავმჯდომარე შალვა პაპუაშვილი X -ზე წერს.
„არ ვაპირებ, ჩავერიო საფრანგეთის შიდა პოლიტიკაში, მაგრამ იმის გათვალისწინებით, რომ ფრანგების 61% მხარს უჭერს პრეზიდენტ მაკრონის გადადგომას და 50%-ს სურს ეროვნული ასამბლეის დაშლა, ახალი არჩევნები პოლიტიკური კრიზისიდან კარგი გამოსავალი შეიძლება იყოს“, – წერს შალვა პაპუაშვილი.
საქართველოში საფრანგეთის ელჩმა შერაზ გასრიმ სოციალურ ქსელში დაწერა, რომ „მაშინ, როცა ემანუელ მაკრონი დემოკრატიისა და თავისუფლებისთვის მებრძოლების მხარდაჭერას ჩვენი საგარეო პოლიტიკის პრიორიტეტად ასახელებს, ის საქართველოში დემონსტრანტებისა და სალომე ზურაბიშვილის გამბედაობას აფასებს და ხაზს უსვამს, რომ ახალი არჩევნები, შეიძლება, პოლიტიკური კრიზისიდან გამოსავალი იყოს“, – წერს საქართველოში საფრანგეთის ელჩი შერაზ გასრი.
მანამდე, საფრანგეთის პრეზიდენტმა განაცხადა, რომ რუსეთი უფრო აგრესიული გახდა, "ამას ვხედავთ საქართველოშიც, საარჩევნო პროცესების დესტაბილიზაციითა და ბიულეტენების ყუთებში ჩაყრით".
