2 დეკემბერს რადიკალურმა შიიტურმა ლიბანურმა მოძრაობამ "ჰეზბოლამ" განაცხადა, რომ განახორციელა, პრევენციული დარტყმა თავდაცვის მიზნით, ისრაელის არმიის პოზიციებზე. მოძრაობის მტკიცებით, ისრაელი არღვევს ცეცხლის შეწყვეტის შეთანხმების პირობებს ლიბანზე საჰაერო იერიშითა და დაბომბვით.
ისრაელის სამხედროების ცნობით, ჰეზბოლას მხრიდან ორი რაკეტა იყო გასროლილი, თუმცა მსხვერპლი არ ყოფილა. ისრაელის პრემიერ-მინისტრმა ბენიამინ ნეთანიაჰუმ პირობა დადო, რომ თავდასხმას "ძლიერი პასუხი" ექნება.
მანამდე ლიბანის ხელისუფლებამ განაცხადა, რომ ისრაელის არმიამ დაბომბა რამდენიმე დასახლებული ადგილი, რის შედეგადაც სულ მცირე ორი ადამიანი დაიღუპა.
ლიბანის პარლამენტის სპიკერმა ნაბიჰ ბერიმ განაცხადა, რომ ბეირუთს ამ დროისთვის შეთანხმების მინიმუმ 54 დარღვევა აქვს დაფიქსირებული ისრაელის მხრიდან.
იმავდროულად, ისრაელის საგარეო საქმეთა მინისტრმა გედეონ საარმა უარყო ინფორმაცია იმის შესახებ, რომ ისრაელმა დაარღვია ცეცხლის შეწყვეტის შეთანხმება და ჰეზბოლა მდინარე ლიტანის სამხრეთით იარაღისა და ძალების გადაადგილებაში დაადანაშაულა.
30 ნოემბერს, ისრაელის თავდაცვის ძალებმა განაცხადა, რომ საჰაერო ძალებმა განახორციელა "სადაზვერვო დარტყმა" ჰეზბოლას სამხედრო ინფრასტრუქტურის ობიექტებზე სირიასა და ლიბანს შორის სასაზღვრო გადასასვლელების მიმდებარედ, რომლებიც, სავარაუდოდ, აქტიურად გამოიყენებოდა სირიიდან ლიბანში იარაღის კონტრაბანდისთვის.
ისრაელმა და ჰეზბოლამ ლიბანში ცეცხლის შეწყვეტის შესახებ შეთანხმებას 27 ნოემბერს მიაღწიეს. შეთანხმების პირობები ასევე ითვალისწინებს, რომ ისრაელის თავდაცვის ძალების ქვედანაყოფები დატოვებენ ლიბანის ტერიტორიას მომდევნო 60 დღის განმავლობაში. შეერთებული შტატები და საფრანგეთი მუშაობენ „ცეცხლის შეწყვეტის სრული განხორციელების“ უზრუნველსაყოფად.
შეთანხმების ფონზე, ნეთანიაჰუმ ასევე პირობა დადო, რომ ისრაელი განაახლებს ბრძოლას ლიბანში, თუ ჰეზბოლა შეიარაღებს ან აღადგენს თავის ინფრასტრუქტურას საზღვართან ახლოს.
