აშშ-ის ახალი ადმინისტრაციის პირობებში მთავარი ოპტიმისტური მოლოდინია, რომ შეიცვლება პოლიტიკური მიდგომები, რაც ურთიერთობების გადატვირთვის საშუალებას მოგვცემს, – ამის შესახებ პარლამენტის თავმჯდომარემ, შალვა პაპუაშვილმა განაცხადა.
მისივე თქმით, უცხოელ პარტნიორებთან ურთიერთობები გეოპოლიტიკური კონტექსტის მძვევალი აღმოჩნდა.
„ველოდებით დონალდ ტრამპის ინაუგურაციას და ოპტიმისტურად ვუყურებთ ახალ ადმინისტრაციას. ის, რაც ბოლო ორ წელიწად-ნახევარია ხდება ჩვენს დასავლელ პარტნიორებთან ურთიერთობაში, არის რეგიონში არსებული კონტექსტის გამო. უპირველეს ყოვლისა, ეს ეხება რუსეთის აგრესიულ ომს უკრაინის წინააღმდეგ. ჩვენი ურთიერთობები ამ კონტექსტის მძევალი აღმოჩნდა. როგორც ჩანს, იმ მომენტში ჩვენს დასავლელ პარტნიორებს ჰქონდათ მოლოდინი, რომ რუსეთთან ესკალაციაზე წავიდოდით. ჩვენ ეს არ გავაკეთეთ, ვიღაცას ეწყინა, ვიღაცა გაბრაზდა, ვიღაცამ გაგვიგო, მიხვდა, რატომ არ გვინდა, ჩვენი ხალხი გავწიროთ ამ საერთო გეოპოლიტიკური კონტექსტის ფარგლებში. ჩვენი მთავარი ოპტიმისტური მოლოდინია, რომ ახალი ადმინისტრაციის პირობებში, შეიცვლება ზუსტად ეს კონტექსტი. კონტექსტი და გარემო როცა შეიცვლება, შესაძლებელი იქნება აღვადგინოთ ურთიერთობის ის დონე, რომელიც მანამდე იყო.
ოპოზიცია უცხო ქვეყნის ხელისუფლების წარმომადგენლებში უყურებს ვისთან შეიძლება ჰქონდეს პირადი კონტაქტი, ნაცნობობა, ასე არ არის პოლიტიკა აწყობილი. ჩვენთვის გადამწყვეტი არის არა ის, ადმინისტრაციის ამა თუ იმ თანამდებობაზე ვინ იქნება, არამედ პოლიტიკური მიდგომების ცვლილება, რაც შეცვლის კონტექსტს რეგიონში. ეს არის ჩვენთვის მთავარი. ეს ურთიერთობების გადატვირთვის შესაძლებლობას მოგვცემს“, – აღნიშნა პაპუაშვილმა.
