„ნაციონალურმა მოძრაობამ“ აქციაზე ხალხის რაოდენობით საკუთარი მხარდამჭერებისგან გუშინ საკადრისი პასუხი მიიღო, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.
„გამსვლელ სიაში არ ჰყავდათ რეგიონის წარმომადგენლები, მათ შორის არ ჰყავდათ ეთნიკური ჯგუფების წარმომადგენლები და შემდეგ უკვირთ, რატომ ვერ მიიღეს მხარდაჭერა, თუნდაც მარნეულში, ახალქალაქში თუ ნინოწმინდაში. როგორ აპირებდნენ, როდესაც ისინი არც კი ჩასულან იქ, რომ ესაუბრათ მოქალაქეებთან და არც საკუთარ გამსვლელ სიებში არ ჰყოლიათ ამ რეგიონის წარმომადგენლები. არც თბილისის ოლქებში ჩაუტარებიათ კამპანია. ამიტომ, ეს არის სიმართლე, რომლისთვისაც უნდოდათ, გუშინ თვალი აერიდებინათ, მაგრამ ასე უნდა უყურონ ყოველდღე. უყურონ რუკას, სადაც, დიახ, აფხაზეთი და ცხინვალი არის გამოსახული, როგორც ფაქტობრივი იურისდიქციის განხორციელების ქვეშ არმყოფი ტერიტორიები და ზუსტად იმ ხალხის წყალობით, ვინც გუშინ ასე პათეტიკურად დროშას უშვებდა ეკრანზე და დროშის წინ იდგა. „ნაციონალური მოძრაობის“ დამსახურება არის, რომ ეს ორი ტერიტორია დღეს ოკუპირებულია, მათ შორის, კოდორი და ახალგორი, რომელზეც 2008 წლამდე სრულად ხორციელდებოდა საქართველოს იურისდიქცია. ამაზე გაგვცენ და აგონ პასუხი, შემდეგ ისაუბრონ რუკის ფერებზე, რომლითაც ცდილობენ, გააღიზიანონ საკუთარი მხარდამჭერები, თუმცა ვნახეთ, რომ ესეც არ გამოუვიდათ და გუშინ საკადრისი პასუხი მიიღეს საკუთარი მხარდამჭერებისგან იმ რიცხოვნობით, რომელიც დაინახეს ბოლოს აქციაზე. ვნახეთ, ბოლოს რომ დაიშალნენ და ქუჩებში სეირნობაზე გადავიდნენ“, – განაცხადა შალვა პაპუაშვილმა.
