საქართველოს საგარეო საქმეთა მინისტრი გრიგოლ ვაშაძე წლის პირველი ოფიციალური ვიზიტით აზერბაიჯანს ეწვევა.
როგორც მინისტრის მოადგილემ ნინო კალანდაძემ დღეს გამართულ ტრადიციულ ბრიფინგზე განაცხადა, ვაშაძის ოფიციალური ვიზიტი ბაქოში 17-19 იანვარსაა დაგეგმილი.
უკვე დაზუსტებულია, რომ მინისტრი მის აზერბაიჯანელ კოლეგას შეხვდება. გრიგოლ ვაშაძეს სავარაუდოდ, ქვეყნის პრეზიდენტი ილჰამ ალიევიც მიიღებს.
რაც შეეხება განსახილველ საკითხებს, კალანდაძის განმარტებით, მხარეები როგორც პოლიტიკურ, ისე ეკონომიკურ საკითხებზე იმსჯელებენ.
"საქართველოს აზერბაიჯანთან მჭიდრო ურთიერთობა აქვს. მოველით, რომ როგორც პოლიტიკური, ისე ეკონომიკური კუთხით ორი ქვეყნის ურთიერთობები უფრო ღრმა ფაზაში გადაინაცვლებს", - დასძინა ვაშაძის მოადგილემ.