საქართველოს კურსს ადგენს და აფასებს ქართველი ხალხი და არა რომელიმე უცხო ქვეყნის მოქალაქე თუ ხელისუფლების წარმომადგენელი, – ამის შესახებ პარლამენტის თავმჯდომარემ, შალვა პაპუაშვილმა განაცხადა.
„ქვეყნის პოლიტიკას თუ საგარეო კურსს განსაზღვრავს და აფასებს ქართველი ხალხი. არც ერთი უცხო ხალხი ამას არ აფასებს. ეს ჰგონიათ ჩხიკვაძეებს და საბანაძეებს. ასეთ ორჯონიკიძეებს ჰგონიათ, რომ სხვა ქვეყანამ უნდა შეგვიფასოს ჩვენ მოსაწონი კურსი გვაქვს, თუ არა მოსაწონი. საქართველოს კურსს ადგენს და აფასებს ქართველი ხალხი და არა რომელიმე უცხო ქვეყნის მოქალაქე, თუ ხელისუფლების წარმომადგენელი.
მესმის, რომ თქვენთვის განმსაზღვრელი არის სხვისი სურვილები, მაგრამ ჩვენთვის განმსაზღვრელია ქართველი ხალხის სურვილები. ქართველი ხალხის სურვილი არის ქვეყნის ინსტიტუციური განვითარება, დემოკრატია, ქვეყნის განვითარება. კიდევ ერთხელ ვნახეთ, რომ ფაქტობრივად ქვეყანაში გვყავს კასტა, ოპოზიციის და ენჯეოების სიმბიოზი, რომელიც ჩვეულებრივი ორჯონიკიძეები არიან, კავშირი არ აქვთ ქართველ ხალხთან. თავიდან უცხო დროშაზე ადგნენ ფეხზე, შემდეგ უცხო ქვეყნის ჰიმნი იმღერეს, შემდეგ უცხო ქვეყნის პოლიტიკოსზე ააწყვეს თავისი დღის წესრიგი და ბოლოს უცხო ქვეყნის დედაქალაქში ჩავიდნენ და საკუთარი სამშობლო დაასმინეს. აი ეს არის ის ღალატის ისტორია, რომელიც პირდაპირ ეთერში გვაჩვენეს. 26 ოქტომბერს არჩევანი ხალხს აქვს ძალიან ცხადი და სალომე ზურაბიშვილმა ეს კიდევ უფრო ცხადი გახადა, როდესაც ამ ორჯონიკიძეების სია შეადგინა ომის ქარტიის სახით. ქართველ ხალხს კიდევ ერთხელ ცხადად აჩვენა, რომ არჩევანი სინამდვილეში არის ან ქართული ინტერესი, ან უცხო ქვეყნის ინტერესი. სხვა არჩევანი 26 ოქტომბერს არ იქნება. ამიტომ, ქართველმა ხალხმა უნდა აირჩიოს, ჩვენ გვინდა ვიყოთ დამოუკიდებელი ქვეყანა, თუ ჩვენ გვინდა გვყავდეს მარიონეტული რეჟიმი“, – აღნიშნა პაპუაშვილმა.
