დღეს, 4 იანვარს, 14:00 საათზე, გმირთა მოედანზე ვეტერანების მხარდამჭერი აქცია გაიმართება.
როგორც "ჯი-ეიჩ-ენს" აქციის ორგანიზატორი საინიციატივო ჯგუფიდან აცნობეს, მასში მონაწილეობას მეომრები მიიღებენ.
"მიტინგის უკან პოლიტიკური ძალები არ დგანან. ის იმ ხალხის ინიციატივით იმართება, რომლებსაც ვეტერანების პრობლემები ყველაზე მეტად ესმის", - აცხადებს საინიციატივო ჯგუფის ერთ-ერთი ლიდერი ჯაბა ტყემალაძე.
მისივე განმარტებით, აქციაზე რამდენიმე მოთხოვნაც გაჟღერდება, მათ შორის ერთ-ერთი პრეზიდენტ სააკაშვილის მიერ ვეტერანების აქციის დარბევისა და მათი შეურაცხყოფისთვის საჯარო ბოდიშის მოხდა იქნება.
შეგახსენებთ, რომ გუშინ, 3 იანვარს, სამართალდამცველებმა გმირთა მემორიალთან მოშიმშილე ვეტერანები ძალის გამოყენებით დაშალეს. ვეტერანებმა, რომლებიც ხელისუფლებისგან "ამაგის დაფასებას" ითხოვდნენ, შიმშილობის აქციას 27 დეკემბერს მიმართეს.