უკრაინის უსაფრთხოების სამსახურში აცხადებენ, რომ რუსეთის საგარეო საქმეთა სამინისტროს განცხადება ტერორიზმთან დაკავშირებით ბუჩის გათავისუფლების ორი წლისთავისა და იქ რუსების მიერ ჩადენილი სისასტიკის ფონზე განსაკუთრებით ცინიკურად ჟღერს.
უკრაინის უსაფრთოების სამსახურის კომენტარს უკრაინული მედია ავრცელებს.
„საერთაშორისო სამართლის ნორმებზე, კერძოდ ტერორიზმ წინააღმდეგ ბრძოლის კონვენციაზე აპელირების მცდელობისას, რუსეთის საგარეო საქმეთა სამინისტროს ავიწყდება, რომ პუტინი ოფიციალურად არის შეყვანილი საერთაშორისო ძებნილთა სიაში - კერძოდ, მას ჰააგის სასამართლოში ელოდებიან უკრაინელი ბავშვების გატაცების გამო.
ტერორიზმის შესახებ განცხადებები განსაკუთრებით ცინიკურია თავად ტერორისტული ქვეყნის მხრიდან ბუჩის გათავისუფლების ორი წლისთავისა და იქ რუსების მიერ ჩადენილი სისასტიკის ფონზე. ჩვენ გვახსოვს ყველა დაღუპული უკრაინელი და ყველაფერს გავაკეთებთ იმისათვის, რომ მტერმა სამართლიანი პასუხი მიიღოს.
ამიტომ, რუსეთის საგარეო საქმეთა სამინისტროს ნებისმიერ სიტყვა უმნიშვნელოა. რუსეთის ფედერაციას რეალურად შეუძლია გააკეთოს მხოლოდ ერთი განცხადება, რომელიც ყურადღების ღირსი იქნება - გამოაცხადოს მთელ მსოფლიოს ომში დამარცხების და უკრაინის მიწიდან საოკუპაციო ჯარების გაყვანის შესახებ“, - ნათქვამია უკრაინის უსაფრთხოების სამსახურის განცხადებაში.
რუსეთის საგარეო საქმეთა სამინისტრომ განაცხადა, რომ ბოლო წლების განმავლობაში რუსეთის ფედერაციის წინააღმდეგ განხორციელებული ყველა ტერაქტის, მათ შორის 22 მარტს «კროკუს სითი ჰოლში“ მომხდარი ტერაქტის კვალი, სავარაუდოდ, უკრაინაში მიდის. რუსეთმა უკრაინას გადასცა მოთხოვნა „უკრაინის უსაფრთხოების სამსახურის უფროსის, ვასილი მალიუკის დაუყოვნებლივი დაკავებისა და ექსტრადიციის შესახებ, ასევე ყველა იმ პირის, რომელიც მონაწილეობდა ბოლო ტერაქტებში“.