ბერლინი, 15-17 მარტს რუსეთში გამართულ საპრეზიდენტო არჩევნებს ლეგიტიმურად არ მიიჩნევს. გერმანიის კანცლერი ოლაფ შოლცი ვლადიმირ პუტინს გამარჯვებას არ მიულოცავს. ეს განცხადება 18 მარტს, გერმანიის მთავრობის ოფიციალური წარმომადგენლის მოადგილემ, კრისტიანე ჰოფმანმა გააკეთა.
მანამდე გერმანიის პრეზიდენტმა ფრანკ-ვალტერ შტაინმაიერმა განაცხადა, რომ არ აპირებს პუტინს მიულოცოს რუსეთის სახელმწიფოს მეთაურის უფლებამოსილების შენარჩუნება.
„გერმანიის კანცლერმა არ მიულოცა {ვლადიმირ პუტინს} და მოგეხსენებათ, ჩვენ არ მივიჩნევთ ამ ე.წ. არჩევნებს არც თავისუფალ და არც სამართლიან არჩევნებად. შედეგი წინასწარ იყო ცნობილი. ჩვენი შეფასებით, ეს არჩევნები არ იყო დემოკრატიული: არ უშვებდნენ რეალურ ოპონენტებს {რუსეთში}. იყო დაშინების ატმოსფერო, იყო დაპატიმრებები. რუსეთში აზრის თავისუფლება არ არსებობს.
რუსეთი დღეს, როგორც კანცლერმა უკვე განაცხადა, არის დიქტატურა და მას ავტორიტარულ რეჟიმში მართავს ვლადიმირ პუტინი. გარდა ამისა, რუსეთის მიერ ოკუპირებულ უკრაინის რეგიონებში არჩევნების ჩატარება უკიდურესად პრობლემურია და დასაგმობი. ჩვენ მას არ ვაღიარებთ. ამ ტერიტორიებზე არჩევნების გამართვის უფლება მხოლოდ უკრაინას აქვს. ეს არის ჩვენი შეფასება ამ ე. წ. არჩევნებზე“ - განაცხადა ჰოფმანმა პრესკონფერენციაზე.
მანამდე, 17 მარტს, გერმანიის საგარეო საქმეთა სამინისტრომ რუსეთში კენჭისყრას "ფსევდოარჩევნები" უწოდა. „რუსეთში ფსევდოარჩევნები არც თავისუფალია და არც სამართლიანი, მათი შედეგი არავის აკვირვებს. რუსეთის ამჟამინდელი მეთაური, ვლადიმირ პუტინი, მართავს ავტორიტარულად, ეყრდნობა ცენზურას, რეპრესიებსა და ძალადობას", - აღნიშნა გერმანიის საგარეო საქმეთა სამინისტრომ.
