ბრიტანეთის თავდაცვის მდივანს გრანტ შაპსს უსაფრთხოებიდან გამომდინარე გასულ კვირას სამხრეთ უკრაინაში ვიზიტზე უარის თქმა მოუწია. ამის შესახებ ბრიტანეთის თავდაცვის დეპარტამენტმა გამოცემა Sunday Times-ის მიერ ვიზიტის გაუქმების შესახებ გავრცელებული ინფორმაციის შემდეგ განაცხადა.
Sunday Times-ის ცნობით, მინისტრმა გადაწყვიტა არ წასულიყო ოდესაში მას შემდეგ, რაც ბრიტანულმა დაზვერვამ გააფრთხილა, რომ ბრიტანული დელეგაციის გეგმები რუსეთისთვის გახდა ცნობილი.
ვიზიტი იგეგმებოდა, 7 მარტს, მას შემდეგ, რაც 6 მარტს რუსულმა ძალებმა ოდესაზე სარაკეტო დარტყმა განახორციელეს უკრაინის პრეზიდენტის ვოლოდიმირ ზელენსკისა და საბერძნეთის პრემიერ-მინისტრის კირიაკოს მიცოტაკისის ქალაქში ყოფნის დროს.
უკრაინის ხელისუფლების ინფორმაციით, თავდასხმას ხუთი ადამიანი ემსხვერპლა.
შაპსი უკრაინაში 7 მარტს ჩავიდა ღამის მატარებლით პოლონეთიდან, რომელსაც თან ახლდა თავდაცვის შტაბის უფროსი ადმირალი ტონი რადაკინი და ბრიტანელი ოფიციალური პირების მცირე ჯგუფი. მან კიევში რამდენიმე შეხვედრა გამართა ვოლოდიმირ ზელენსკისთან და მისი ადმინისტრაციის წარმომადგენლებთან.
Sunday Times-ის ცნობით, მანამდე დაგეგმილი ვიზიტი ოდესაში გამგზავრებამდე რამდენიმე საათით ადრე გაუქმდა დაზვერვის ინფორმაციის საფუძველზე, რომლის თანახმად, კრემლისთვის ცნობილი გახდა შაპსის გეგმების შესახებ.
”პუტინი გამოჩნდა, როგორც უგუნური და დაუნდობელი ადამიანი, ის ახლოს იყო დასავლელი ლიდერის მკვლელობასთან, არ აქვს მნიშვნელობა განზრახ თუ შემთხვევით, ვფიქრობ, იმის გათვალისწინებით, რომ ზელენსკი, საბერძნეთის პრემიერ -მინისტრი და ოლექსანდრ კუბრაკოვი [უკრაინის პრემიერ- მინისტრის მოადგილე] იყვნენ მხოლოდ 400 მეტრში სარაკეტო დარტყმის ადგილიდან და შემდეგ კონკრეტული სადაზვერვო მონაცემების გათვალისწინებით... უგუნური იქნებოდა დაჟინებით მოთხოვნა [ოდესაში ვიზიტის]“, - განუცხადა შაპსმა გამოცემას დაბრუნების შემდეგ.
