საფრანგეთის პარლამენტმა მხარი დაუჭირა აბორტის უფლების კონსტიტუციაში ჩაწერას. იუწყება Le Figaro. საფრანგეთის პარლამენტში გამართულ კენჭისყრაზე აბორტის უფლების კონსტიტუციაში შეტანას მხარი სულ 780-მა დეპუტატმა დაუჭირა, 72 კი წინააღმდეგი იყო.
„ჩვენ ვუგზავნით მესიჯს ყველა ქალს: თქვენი სხეული გეკუთვნით თქვენ და არავის შეუძლია, თქვენ ნაცვლად გადაწყვეტილების მიღება“, – განაცხადა ქვეყნის პრემიერ-მინისტრმა, გაბრიელ ატალიმ.
საფრანგეთის პრეზიდენტმა, ემანუელ მაკრონმა კი ეს ნაბიჯი საფრანგეთის სიამაყედ შეაფასა.
ცვლილება კონსტიტუციის 34-ე მუხლში შევიდა, სადაც ჩაიწერა, რომ კანონი განსაზღვრავს პირობებს, რომლითაც ქალს აქვს გარანტირებული თავისუფლება, მიმართოს აბორტს.
საფრანგეთი პირველი ქვეყანა გახდა, რომელმაც აბორტი კონსტიტუციურ უფლებად აქცია.
გადაწყვეტილების მიღება მოსალოდნელი იყო, რადგან იდეას მანამდე ორივე პალატაში საკმარისი ხმები ჰქონდა მიღებული.
სხვადასხვა გამოკითხვის თანახმად, ფრანგების 80%-ზე მეტი მხარს უჭერდა აბორტის უფლების კონსტიტუციაში ჩაწერას.