"საქართველოს დეოკუპაციის თემა მომავალ წელს პრიორიტეტული იქნება, თუმცა ამ მიმართულებით წელსაც დიდი ძალისხმევა იქნა გაწეული. 2010 წლის მაისში ჩავატარეთ კონსულტაციები რეგიონალურ ჯგუფებთან, ამის შემდეგ გენერალური ასამბლეის ფარგლებში ჩავატარეთ 80-მდე შეხვედრა, პირადად მე შევხვდი 60 კოლეგას და ეს ყველაფერი ძალიან კარგი მოსამზადებელი სამუშაო იყო გაეროს 64-ე სესიისთვის, რომელზედაც კიდევ ერთხელ იქნა მიღებული იძულებით გადაადგილებული პირების შესახებ რეზოლუცია", - განაცხადა საქართველოს საგარეო საქმეთა მინისტრმა გრიგოლ ვაშაძემ წლის შედეგების შემაჯამებელ პრესკონფერენციაზე.

მისი განმარტებით, საქართველოს მხარდამჭერი ქვეყნების რიცხვი იზრდება, რუსეთის პოზიციის გამზიარებელთა რაოდენობა კი მცირდება.

"გვაქვს მხარდამჭერთა მზარდი დინამიკა და ეს მნიშვნელოვანია. გაეროს გენერალური ასამბლეის მიერ მიღებულ რეზოლუციას 50-მა სახელმწიფომ დასუჭირა მხარი, ხოლო რუსეთის პოზიციის მომხრეები შემცირდა 18-იდან 17-მდე", - დასძინა მან.

მინისტრის შეფასებით, აქტიურად მიმდინარეობდა მუშაობა ევროსაბჭოშიც, რომელმაც წლის განმავლობაში საქართველოს საკითხზე 6 ანგარიში მოამზადა.

"მიუხედავად რუსეთის მცდელობისა შეეწყვიტა ევროპის საბჭოს გენერალური მდივნის მოხსენებით გამოსვლის პრაქტიკა, გენმდივანმა ორი მოხსენება წარმოადგინა და ორივე მათგანში საქართველოს თემატიკამ დაიკავა ის ადგილი, რომელიც უნდა დაეკავებინა. 6 ანგარიში მოამზადდა ევროპის საბჭოში შესაბამისმა ქვედანაყოფებმა და ყველა მათგანი პოზიტიურია. ისინი საკმაოდ კარგად ასახავს ჩვენთვის საჭირბოროტო თემატიკას", - განმარტა საგარეო საქმეთა მინისტრმა.

ვაშაძის თქმით, უაღრესად მნიშვნელოვანია ისიც, რომ პოლიტიკურ დასავლეთსა და საერთაშორისო თანამეგობრობაში დამკვიდრდა ტერმინები "ოკუპაცია" და "ეთნიკური წმენდა".

რაც შეეხება ევროკავშირთან ურთიერთობას, საქართველოს მთავარი დიპლომატი საქართველოსა და ორგანიზაციას შორის სავიზო რეჟიმის გამარტივებისა და რეადმისიის შესახებ ხელშეკრულებების, ასევე ერთიანი საავიაციო სივრცის შექმნის შესახებ შეთანხმებების გაფორმებას მნიშვნელოვანს უწოდებს.

"რაც შეეხება ყოვლისმომცველი ვაჭრობის შესახებ შეთანხმებას, იმედი ვიქონიოთ, რომ მოლაპარაკებები მომავალი წლის პირველ ნახევარში გაიხსნება. გარდა ამისა,
გააქტიურდა თანამშორმლობა ევროკავშირთან "პარტნიორობა მობილურობისთვის" პროგრამის ფარგლებში. 16 წევრ ქვეყანასთან ვთანამშრომლბთ. აქტიურად ვმონაწილეობდით "აღმოსავლეთ პარტნიორობის" პროგრამის ფარგლებში გამართულ შეხვედრებშიც", - აღნიშნა ვაშაძემ.

ვაშაძე დადებითად აფასებს წლის განმავლობაში ნატოსთან საქართველოს ურთიერთობასაც და დასძენს, რომ ნატო-საქართველოს კომისიის ფარგლებში სხვადასხვა დონეზე 19 სხდომა ჩატარდა.

"გარდა ამისა, ძალიან მნიშვნელოვანი იყო ნატოს გენერალური მდივნის საქართველოში ვიზიტი", - განაცხადა ვაშაძემ.

რაც შეეხება ეუთოს, საქართველოს მთავარი დიპლომატის შეფასებით, "დასაკვეხნი აქ არაფერი გვაქვს".

"რუსეთმა ყველა კონსტრუქციული წინადადება დაბლოკა და აგრძელებს თავის კურსს იმის შესახებ, რომ ეუთო გადააქციოს ხელშებორკილ, უმოქმედო ორგანიზაციად. აქედან გამომდინარე, ასტანის სამიტი იყო ძალიან მძიმე", - განმარტა მინისტრმა წლის შედეგების შემაჯამებელ პრესკონფერენციაზე.