ქვეყნები, რომლებიც მხარს უჭერენ ნიდერლანდების პრემიერ-მინისტრ მარკ რუტეს კანდიდატურას ნატო-ს გენერალური მდივნის თანამდებობაზე, მუშაობენ, რომ მისი დანიშვნის შესახებ გადაწყვეტილება ზაფხულამდე მიიღონ. ამის შესახებ გამოცემა Bloomberg წყაროებზე დაყრდნობით იუწყება.
ნატო-ში რუტეს მხარდამჭერებს სურთ, რომ შეთანხმების პროცესი ზაფხულის დაწყებამდე დასრულდეს.
ეს ვადები შესაძლოა, გაგრძელდეს, მაგრამ ალიანსის წევრების უმეტესობა მოელის, რომ გადაწყვეტილება მიიღება ივლისში ვაშინგტონში დაგეგმილ ნატო-ს სამიტამდე.
გადაწყვეტილება ჩრდილოატლანტიკური ალიანსის 31 წევრს შორის ერთსულოვანი უნდა იყოს და რუტე უკვე ფავორიტია გენერალური მდივნის იენს სტოლტენბერგის შემცვლელად, რომელსაც ვადა ოქტომბერში ეწურება, წერს Bloomberg.
„ნატო-ს გენერალური მდივნის როლი განსაკუთრებით მნიშვნელოვანი იქნება, რადგან რუსეთის ომი უკრაინასთან შეიძლება წლების განმავლობაში გაგრძელდეს. ნატო-ს ლიდერმა უნდა იპოვოს ბალანსი ალიანსსა და რუსეთს შორის რაიმე პირდაპირი შედეგების ან უფრო ფართო ესკალაციის თავიდან ასაცილებლად, ასევე მოკავშირეები მეტად წაახალისოს გააგრძელონ უკრაინის სამხედრო და ფინანსური მხარდაჭერა, რადგან საზოგადოება ამ ომისგან გამოწვეული ხარჯებით უკვე იღლება“, - აღნიშნავს გამოცემა.
რუტე ნიდერლანდების პრემიერ-მინისტრობის 13-წლიან ვადას მას შემდეგ ასრულებს, რაც მისი მთავრობა დაიშალა ივლისში მიგრაციის საკითხების ირგვლივ უთანხმოების გამო. ის თანამდებობას დატოვებს, როგორც კი ახალი კოალიციური მთავრობა შეიქმნება, რომელსაც ულტრამემარჯვენე პოლიტიკოსი გერტ უილდერსი უხელმძღვანელებს.
