"იმის გათვალისწინებით, რომ 2009 წელს ეკონომიკა შემცირდა და - 4%-იანი ვარდნა დაფიქსირდა, 2010 წელს მთავარი ამოცანა ყველა ინსტრუმენტის გამოყენებით ეკონომიკის ამუშავება და ზრდის ხელშეწყობა იყო"- ამის შესახებ განცხადება ფინანსთა მინისტრმა კახა ბაინდურაშვილის გააკეთა.
„ყველაზე კონსერვატიული სცენარით, 2010 წელს 2%-იან ზრდას ვგეგმავდით, თუმცა დღეს 6%-იანი ზრდა გვაქვს, რაც უკვე შემდგარი ფაქტია და შედეგი თავდაპირველ პროგნოზს 4%-ით აღემატება, რაც იმის მაჩვენებელია, რომ ეკონომიკა სწრაფად ამუშავდა. ყველა უცხოელი ექსპერტი აღნიშნავს, რომ ჩვენს რეგიონში საქართველოს ეკონომიკამ ერთ-ერთ ყველაზე წარმატებულად დასძლია მსოფლიო ეკონომიკური კრიზისი და მისგან გამოწვეული ნეგატიური შედეგები," - განაცხადა კახა ბაინდურაშვილმა.
ფინანსთა მინისტრის განცხადებით, ეკონომიკის 6%-იანი ზრდის მისაღწევად მთავრობამ რამდენიმე ეფექტური ინსტრუმენტი გამოიყენა, მათ შორის:
სახელმწიფოში შემოსული საერთაშორისო დახმარებები, რამაც ქვეყანას საშუალება მისცა, რომ ის დეფიციტი, რაც გამოწვეული იყო უცხოური ინვესტიციების ნაკლებობით, შევსებულიყო და შენარჩუნებულიყო ეკონომიკური აქტივობები;
ფისკალური სტაბილიზაცია. 2009 წელს ქვეყანას ჰქონდა დაახლოებით 10%-მდე დეფიციტი, რაც გამოწვეული იყო ეკონომიკის სტიმულირების პროექტის დაწყებით, შემდეგ დეფიციტი ჩამოვიდა 7.4%-მდე, ახლა დეფიციტი შემცირებულია 6%-მდე.
„საერთაშორისო ფინანსურ დახმარებებს სწორი საინვესტიციო მიმართულება მივეცით, პირველ რიგში, ეს შეეხება ინფრასტრუქტურას. ჩვენ შევინარჩუნეთ სამშენებლო სექტორის აქტივობა. პრობლემა არ შექმნია საბანკო სექტორს. ასევე სწორი გადაწყვეტილება იყო ტურიზმის სექტორში ინვესტირება და ფისკალური სტაბილურობის უზრუნველყოფა. 10%-დან დეფიციტის 6%-მდე შემცირება კარგ მიღწევად შეიძლება ჩაითვალოს," - განაცხადა მინისტრმა.
მან ასევე ყურადღება გაამახვილა საქართველოს საერთაშორისო მიღწევებზე: 2010 წელს Mოოდყ'ს-ის რეიტინგით საქართველო დაუბრუნდა 2008 წლის ომამდე და 2009 წლის მსოფლიო ეკონომიკურ კრიზისამდე არსებულ ნიშნულს BB-; 2010 წელს საქართველო №1 რეფორმატორი ქვეყანაა Doing Business 2011 რეიტინგში; Transparency International -ის ბარომეტრით საქართველო ყველაზე ნაკლებ კორუმპირებულ ქვეყნად დასახელდა.
„ფინანსთა სამინისტროს კიდევ ერთი ამოცანა იყო სახელმწიფო ვალის მართვა, - განაცხადა ფინანსთა მინისტრმა, მიუხედავად იმისა, რომ ეკონომიკის ასამუშავებლად დიდი შემოდინებები უნდა დაგვეკონტრაქტებინა, მოვახერხეთ და შევინარჩუნეთ ვალის სტაბილურობა. 2010 წელს მშპ-სთან მიმართებაში სახელმწიფო ვალი 46%-ს შეადგენდა, ეს ნიშნული შენარჩუნდება 2011 წელსაც. შემდეგ ეს მაჩვენებელი 44%-დან-41%-მდე შემცირდება. თავისუფლების აქტის პროექტით, საზოგადოებისთვის შეთავაზებულია 60%-იანი ზღვარი მშპ-სთან მიმართებაში, ესაა ის უსაფრთხო ნიშნული, რომელზედაც ყველა საერთაშორისო ექსპერტი თანხმდება, თუმცა ჩვენი ამოცანაა, გვქონდეს 45%-იანი ნიშნული, რათა 15%-იანი მანევრირების მონაკვეთი ქვეყანას რჩებოდეს,"' - განაცხადა ფინანსთა მინისტრმა.
როგორც კახა ბაინდურაშვილმა განაცხადა, მიმდინარე წელს მოხერხდა ყველა ვალდებულების დაფინანსება. მისი თქმით, 2010 წელს საავადმყოფოების რეაბილიტაციისათვის სახელმწიფოს მხრიდან პირველად განხორციელდა ინვესტიცია. 2010 წელს უკავშირდება განათლების სფეროში ყველაზე ამბიციური პროექტების დაწყება და განხორციელება. ასევე მნიშვნელოვანი პროექტები დაფინანსდა ინფრასტრუქტურის მიმართულებით: გომბორის გზა, სამცხე-ჯავახეთის გზა, სხვა წარმატებული პროექტები: ბათუმი-ანაკლია-მესტიის ტურისტული ზონები. „სწორედ ასეთი ზონების დამსახურებაა, რომ ქვეყნის ეკონომიკა სწრაფად ამუშავდა. ჭარბი შემოდინებები ქვეყანას სწორედ ტურიზმის სექტორიდან ჰქონდა," - განაცხადა მინისტრმა.
კახა ბაინდურაშვილმა განსაკუთრებული აქცეტი გააკეთა საგადასახადო/საბაჟო ადმინისტრირების კუთხით 2010 წელს გატარებულ რეფორმებზე. მისი თქმით, კოლოსალური სამუშაოები გაიწია საკანონმდებლო კუთხით - დაიწერა ახალი საგადასახადო კოდექსი, მოხდა მასში საბაჟო კოდექსის ინტეგრირება. „შემოვიდა ახალი რეგულაციები, ახალი სერვისები, ახალი ინფრასტრუქტურული პროექტები, მათ შორის, გაფორმების ეკონომიკური ზონები სწორედ 2010 წლის შედეგია," - განაცხადა ფინანსთა მინისტრმა. მან ასევე ისაუბრა ხაზინაში 2010 წელს განხორციელებულ რეფორმებზე, მისი თქმით, ხაზინა მთლიანად ელექტრონულ ფორმატში მუშაობს, რაც ხელს უწყობს ტრანსპარენტულობას და აღრიცხვიანობის მოწესრიგებას. მინისტრის განცხადებით, ანალოგიური რეფორმები გატარდა ფინანსთა სამინისტროს მომსახურების სააგენტოს კუთხით. დაინერგა ელექტრონული აუქციონები, რითაც ხდება სახელმწიფო საკუთრებაში არსებული ქონების რეალიზება.
ფინანსთა მინისტრის განცხადებით, 2011 წელს ეკონომიკის ზრდის ხელშეწყობასთან ერთად, №1 პრიორიტეტი იქნება „ახალი კურსის" განხორციელება - საგადასახადო ადმინისტრირების გამარტივება. „ეს კეთდება იმისთვის, რომ მეორე სუნთქვა გაეხსნას ქართულ ბიზნესს. პირველი ეტაპი ბიზნესისთვის გადასახადების შემცირება და კარგი გარემოს დამკვიდრება იყო. ახლა გადავდივართ შემდგომ ეტაპზე, რასაც ახალი კურსი ითვალისწინებს - ესაა სანდო, მარტივი და ეფექტური საგადასახადო სისტემა," - განაცხადა ფინანსთა მინისტრმა.