2010 წლის იანვარ-ნოემბერში საქართველოს საგარეო სავაჭრო ბრუნვამ ევროკავშირის ქვეყნებთან 1540 მლნ. აშშ დოლარი შეადგინა, რაც წინა წლის შესაბამის მაჩვენებელზე 11 პროცენტით მეტია; აქედან ექსპორტი 267 მლნ. აშშ დოლარი იყო (22 პროცენტით მეტი), ხოლო იმპორტი - 1273 მლნ. აშშ დოლარი (9 პროცენტით მეტი). საქართველოს საგარეო სავაჭრო ბრუნვაში ამ ქვეყნების წილმა 26 პროცენტი შეადგინა, მათ შორის ექსპორტში 19 პროცენტი და იმპორტში 28 პროცენტი. (2009 წლის იანვარნოემბერში - შესაბამისად 28, 21 და 30 პროცენტი). ამ ქვეყნებზე მოდიოდა სავაჭრო დეფიციტის 33 პროცენტი (2009 წლის იანვარ-ნოემბერში ასევე - 33 პროცენტი).
შეგახსენებთ, რომ 2010 წლის იანვარ-ნოემბერში საქართველოს საგარეო სავაჭრო ბრუნვამ (არაორგანიზებული ვაჭრობის გარეშე) 5883 მლნ. აშშ დოლარი შეადგინა, რაც წინა წლის ანალოგიურ მაჩვენებელზე 19 პროცენტით მეტია; აქედან ექსპორტი 1394 მლნ. აშშ დოლარი იყო (37 პროცენტით მეტი), ხოლო იმპორტი - 4489 მლნ. აშშ დოლარი (15 პროცენტით მეტი). "საქსტატის" ინფორმაციით, საქართველოს უარყოფითმა სავაჭრო ბალანსმა 2010 წლის იანვარ-ნოემბერში 3095 მლნ. აშშ დოლარი შეადგინა (7 პროცენტით მეტი).
2010 წლის იანვარ-ნოემბერში 2008 წლის ანალოგიურ პერიოდთან შედარებით საგარეო სავაჭრო ბრუნვა 25 პროცენტით, ექსპორტი 7 პროცენტით, ხოლო იმპორტი 29 პროცენტით შემცირდა. რაც შეეხება უარყოფით სავაჭრო ბალანსს, 2010 წლის იანვარ-ნოემბერში 36 პროცენტით ნაკლები დაფიქსირდა, ვიდრე 2008 წლის შესაბამის პერიოდში. საქართველოს საგარეო ვაჭრობაში ჩამოყალიბებულ ზოგად ტენდენციებს ნათლად ასახავს მაჩვენებელთა განვითარების გრაფიკული გამოსახულება 2005-2010 წლების იანვარ-ნოემბრის დინამიკური მწკრივის მიხედვით.
