საქართველოს ფინანსთა მინისტრის კახა ბაინდურაშვილის შეფასებით, ქვეყნისთვის ყველაზე დიდი რისკი შეიძლება პირდაპირი უცხოური ინვესტიციების შეწყვეტა იყოს.
"რისკები არსებობს, ისეთი ქვეყნებისთვის, როგორიც საქართველოა და ისეთისთვისაც, როგორიც ამერიკის შეერთებული შტატებია. 100% დაცული არავინ არის. იგივე აშშ-ის, ირლანდიის, ესპანეთის, იტალია, საბერძნეთზე რომ არაფერი აღარ ვთქვათ. ჩვენ მთავარ გამოწვევად 2011 წელს უცხოური პირდაპირი ინვესტიციების გაძლიერება რჩება და ყველაფერს გავაკეთებთ ამისთვის. თუმცა, როდესაც გამოვდივართ ეკონომიკის სტიმულირებიდან და დეფიციტი 4%-მდე ჩამოდის, ამ შემთხვევაში უკვე მთავრია კერძო, პირდაპირი უცხოური ინვესტიციები და თუ ასე არ იქნება ეს არის ყველაზე დიდი რისკი რაც შეიძლება არსებობდეს", - აღნიშნა ბაინდურაშვილმა შემაჯამებელ პრესკონფერენციაზე.
ამასთან, მინისტრის შეფასებით, არსებობს ენდოგენური რისკები, რაც პირდაპირ უკავშირდება ევროპის ეკონომიკის ზრდას, რომელზეც კითხვის ნიშნები ჯერ კიდევ არსებობს.
"ძნელია იმის თქმა, მოხდება თუ არა რომელიმე რისკის მატერიზაცია. ევროპას გააჩნია საკმარის რესურსი იმისთვის, რომ პრობლემები მართოს და შესაბამისად მის დაძლევის შემთხვევაში, ეს ჩვენზე რისკის სახით არ აისახება. როგორც იცით, ჩვენი ვაჭრობის თითქმის 1/3 ევროკავშირზე მოდის და შესაბამისად რაც ხდება ევროპაში შემდგომში ჩვენზე სარკისებურ ასახვას პოვებს", - აღნიშნა ბაინდურაშვილმა.
