სარფის ახალი საბაჟო-გამშვები პუნქტის ერთობლივი მართვა სავარაუდოდ 26 მაისიდან განხორციელდება.
ამის შესახებ საქართველოს ფინანსთა მინისტრმა კახა ბაინდურაშვილმა წლის შემაჯამებელ პრესკონფერენციაზე აღნიშნა.
"სარფის ახალი საბაჟო-გამშვები პუნქტი 2011 წლის 26 მაისს ამოქმედდება. ჩვენ გვინდა, რომ ამავე დღიდან გვინდა, რომ ძალაში შევიდეს საბაჟოს ერთობლივი მართვაც. აღნიშნულთან დაკავშირებით თურქულ მხარესთან ფაქტიურად ყოველდღიურ სამუშაოებს ვაწარმოებთ", - განაცხადა ბაინდურაშვილმა.
მისივე თქმით, საბაჟოს ერთობლივი მართვის შესახებ ხელშეკრულების რატიფიცირებას საქართველოს პარლამენტი გაზაფხულზე მოახდენს, რის შემდეგაც ხელშეკრულებას თურქეთის პარლამენტიც დაამტკიცებს.
როგორც ცნობილია, პროექტი ითვალისწინებს სარფის საბაჟო-გამშვები პუნქტის სრულ რეკონსტრუქციას, რომლის შემდეგ ახალი შენობა იქნება მაღალი გამტარუნარიანობის მქონე, თანამედროვე ტექნოლოგიებით აღჭურვილი ინფრასტრუქტურა, რომელიც დააჩქარებს და კომფორტულს გახდის საბაჟო გაფორმების პროცესს, როგორც ფიზიკური პირებისათვის, ისე ტვირთებისათვის. აღსანიშნავია ისიც, რომ პროექტის მიხედვით, საბაჟო-გამშვები პუნქტის გარკვეული ნაწილი შევა ზღვაში, რითაც მოხდება ტერიტორიის მნიშვნელოვნად გაფართოება. მშენებლობა მთლიანად სახელმწიფო ბიუჯეტიდან ფინანსდება.
