2011 წელს ფინანსთა სამინისტროს ნომერ პირველი პრიორიტეტი საგადასახადო ადმინისტრირების გამარტივება იქნება.
ამის შესახებ საქართველოს ფინანსთა მინისტრმა კახა ბაინდურაშვილმა წლის შემაჯამებელ ბრიფინგზე აღნიშნა.
"2010 წელს ჩვენი პრიორიტეტი სახელმწიფოს მხრიდან ეკონომიკის ხელშეწყობა იყო და ყველაზე დიდი ძალისხმევა ამ მიმართულებით დავხარჯეთ. რა თქმა უნდა ეს პრიორიტეტი მომავალ წელსაც იქნება შენარჩუნებული, მაგრამ თუ სამინისტროს სხვა მიმართულებებს გადავხედავთ, ნომერ პირველი პრიორიტეტი ახალი კურსის განხორციელება იქნება, რომელიც პირველ რიგში საგადასახადო ადმინისტრირების გამარტივებას გულისხმობს", - აღნიშნა ფინანსთა მინისტრმა.
მისი შეფასებით, ეს ქართულ ბიზნეს მეორე სუნთქვის ჩართვის საშუალებას მისცემს, რადგან გადასახადების შემცირება და კარგი გარემოს შექმნა ბიზნესისთვის უკვე მოხდა.
"ახლა უნდა გადავიდეთ მეორე ეტაპზე, რასაც ახალი კურსი ითვალისწინებს. და ეს არის უფრო ადვილი და მარტივი ადმინისტრირების ჩამოყალიბება", - დასძინა მინისტრმა.