საქართველოს ფინანსთა მინისტრი კახა ბაინდურაშვილი 2010 წლის ერთ-ერთ წარმატებად საგადასახადო-საბაჟო ადმინისტრირებას ასახელებს.
"ამ მხრივ 2010 წელი ყველაზე გამორჩეული იყო. ეს არის წელი, რომლის დროს ახალი ეკონომიკური კურსი მომზადდა. ასევე კოლოსალური სამუშაო გაიწია ახალი საგადასახადო კოდექსის შემუშავების კუთხით, რომელშიც საბაჟო კოდექსის ინტეგრაცია მოხდა. შემოვიდა ჩვენს საკანონმდებლო სივრცეში ახალი რეგულაციები, რომლებიც 2011 წლიდან ამუშავდება, ასევე დაინერგა ახალი სერვისები, როლის ნაწილიც უკვე გაშვებულია, ხოლო ნაწილი მომავალი წლიდან ამოქმედდება", - აღნიშნა ბაინდურაშვილმა.
მისივე თქმით, მიმდინარე წელს უკავშირდება ისეთ მსხვილი ინფრასტრუქტურული ცვლილების ჩამოყალიბება, როგორიც გაფორმების ეკონომიკური ზონაა (გეზი).
"რეფორმები განხორცილდა ხაზინაში, რომელიც მთლიანად ელექტრონულ ფორმატზე გადავიდა, რაც პირველ რიგში ხელს შეუწყობს ტრანსფარენტულობას და აღრიცხვიანობის მოწესრიგებას სახელმწიფო სექტორში", - აცხადებს ბაინდურაშვილი.
როგორც ცნობილია 3 დეკემბერს საქართველოს პრეზიდენტმა მიხეილ სააკაშვილმა ლილოში ოფიციალურად გახსნა ახალი საერთაშორისო სტანდარტების შესაბამისი გაფორმების ეკონომიკური ზონა. გაფორმების ეკონომიკური ზონა (გეზი) ეს არის საქართველოში უპრეცედენტო სიდიდის, 12 ჰექტარზე გაშენებული კეთილმოწყობილი ტერიტორია სრული კომფორტით. სპეციალურად დაგეგმარებული ავტოსადგომი გათვლილია 400 სატვირთო ავტომანქანაზე. შესაძლებელია ერთდროულად ნებისმიერი რაოდენობის იმპორტიორის მომსახურება კვირაში შვიდი დღე, 24 საათის განმავლობაში. ტვირთის გაფორმებისას, იმპორტიორს აღარ უწევს ძვირადღირებული ბროკერისა და დეკლარატის დაქირავება.
იმპორტიორის სრული ინფორმირება ხდება ერთ ფანჯარასთან, რითაც იგი ზოგავს დროსა და ენერგიას. იმპორტიორს შესაძლებლობა აქვს ისარგებლოს ექსპერტისა და ტექნიკური პერსონალის მომსახურებით. "გეზში" ტვირთის გაფორმების საფასურის გადახდა შესაძლებელია 5-დღიანი გადავადებით. ტვირთის გაფორმების სრული პროცედურა აქ რამდენიმე წუთში სრულდება.
რაც შეეხება ახალ საგადასახადო კოდექსს, პარლამენტმა ის მიმდინარე წლის 17 სექტემბერს დაამტკიცა, რომელიც 2011 წლის 1 იანვრიდან უნდა ამოქმედდეს, ამის გათვალისწინებით კი ძველ კოდექს მოქმედების ვადა მიმდინარე წლის 31 დეკემბერ შეუწყდება.
