ახალ 2024 წელს თბილისი პირველი რესპუბლიკის მოედანზე საახალწლო გალაკონცერტით შეხვდა. 

დედაქალაქის მერმა თბილისის მოსახლეობას საკონცერტო სცენიდან მიმართა და ახალი წელი მიულოცა. 

„გილოცავთ 2024 წლის შემობრძანებას. მინდა მივულოცო ემიგრაციაში მყოფ ჩვენს თანამემამულეებს. დღეს, ამ ჯადოსნურ ღამეს, მთელ მსოფლიოში ერთიანდებიან ერთი სურვილის გარშემო - მშვიდობა იყოს ჩვენს ქვეყნებში და კეთილდღეობა ჩვენს ოჯახებში. 

სულ რამდენიმე წუთის წინ გავაცილეთ 2023 წელი და მინდა, მადლობა გადავუხადო ამ წელს იმ წარმატებისთვის, რაც ჩვენს ქვეყანას და ჩვენს ულამაზეს დედაქალაქს ერგო ამ ერთი წლის განმავლობაში. 

რა თქმა უნდა, ყველა წარმატების უკან დგას უამრავი ადამიანის შრომა.

მინდა მადლობა გადავუხადო ყველას, ვინც თავიანთი შრომით, შემოქმედებით, მიღწეული სპორტული წარმატებით და თუნდაც, ყოველდღიური, კეთილსინდისიერი პროფესიული საქმიანობით ჩვენი ქვეყანა წინ წასწია, გაალამაზა ჩვენი დედაქალაქი. არაფერია იმაზე დიდი ბედნიერება, რომ შენი გადადგმული ნაბიჯებით აბედნიერებდე ხალხს და ქმნიდე უკეთეს გარემოს. 

მინდა, ასევე მივულოცო და მადლობა გადავუხადო ყველა იმ ადამიანს, ვინც დღეს თავის პროფესიულ მოვალეობას ასრულებს, ემსახურება თავის ქვეყანას და აქ მცხოვრებ ადამიანებს", - განაცხადა კახა კალაძემ.

დედაქალაქის მერმა მილოცვაში ასევე ხაზი გაუსვა 2023 წლის მთავარ მიღწევას - ევროკავშირის წევრობის კანდიდატის სტატუსს.

„სულ რამდენიმე დღის წინ, ჩვენმა ქვეყანამ მიიღო დამსახურებულად მიიღო ევროკავშირის წევრობის კანდიდატის სტატუსი და კიდევ ერთხელ გილოცავთ, მეგობრებო. ვულოცავ სრულიად საქართველოს. ეს არის ჩვენი ქვეყნის მოქალაქეების და იმ გუნდის დამსახურება, რომელსაც „ქართული ოცნება - დემოკრატიული საქართველო" ქვია. 

მინდა მივულოცო ჩვენს თანამემამულეებს, რომლებიც ემიგრაციაში იმყოფებიან და ვუსურვო დაბრუნება შინ - ევროპაში. 

გილოცავთ, პირველ რიგში ჯანმრთელობას გისურვებთ. დღეგრძელობა, სიხარული, ბედნიერება არ მოგკლებოდეთ თქვენ ოჯახებთან ერთად. ღმერთი იყოს ჩვენი ქვეყნის და ამ ქვეყანაში მცხოვრები თითოეული ადამიანის მფარველი. 2024 წელი აუცილებლად იქნება მეტი გამარჯვების და სიხარულის მომტანი ჩვენი ქვეყნისთვის და ჩვენი ულამაზესი დედაქალაქისთვის", - განაცხადა კახა კალაძემ. 

გალაკონცერტი პირველი რესპუბლიკის მოედანზე გრძელდება. ორსაათიან შთამბეჭდავ სანახაობას, სახელწოდებით „ევროპული ქალაქიდან ევროპაში" მაყურებელს ქართველი მომღერლები, გუნდები, ანსამბლები და მოცეკვავეები ეროვნულ სიმფონიურ ორკესტრთან და მაესტრო ნიკოლოზ რაჭველთან ერთად წარუდგენენ.