ახმეტის მუნიციპალიტეტის საკრებულომ 2011 წლის ბიუჯეტის პროექტის საჯარო განხილვა მოაწყო. ახმეტის მუნიციპალიტეტის გამგეობის საფინანსო სამსახურის უფროსის, არსენ ბუღრიძის თქმით, 2010 წლის ბიუჯეტი 5 914 700 ლარს შეადგენდა, აქედან ადგილობრივი თანხა 3 321 429 ლარი იყო. 2011 წლის ბიუჯეტის პროექტის მიხედვით კი ახმეტის მუნიციპალიტეტის ბიუჯეტი 3 966 800 ლარით განისაზღვრება.
"2011 წლის ბიუჯეტში გათვალისწინებული 3 966 800 ლარი მხოლოდ ადგილობრივი თანხებია. აქედან 1 540 000 ლარი ადგილობრივი შემოსავლებია, 2 426 800 ლარი კი გამოთანაბრებული და მიზნობრივი ტრანსფერებია. ამ ბიუჯეტს სახელმწიფოსგანაც დაემატება გარკვეული თანხა, მაგრამ რა რაოდენობით, ჯერჯერობით უცნობია", -განაცხადა ბუღრიძემ.
2011 წლის ბიუჯეტის პროექტის მიხედვით, ახმეტის მუნიციპალიტეტის პრიორიტეტები სოციალური დაცვა და ინფრასრტუქტურაა. სოციალური და ჯანდაცვის პროგრამების დაფინანსება 2010 წლის ბიუჯეტის გეგმასთან შედარებით 59 500 ლარით არის გაზრდილი და 275 000 ლარს შეადგენს. 336 800 ლარია გათვალისწინებული ინფრასტრუქტურის განვითარებისთვის.
2011 წლის ბიუჯეტის პროექტში 98 700 ლარით არის გაზრდილი საკრებულოს და გამგეობის ადმინისტრაციული ხარჯები. ახმეტის მუნიციპალიტეტის საკრებულოს თავმჯდომარის ალექსი მაილაშვილის განმარტებით, ადმინისტრაციული ხარჯების გაზრდა თანამშრომლების ხელფასების მომატებამ განაპირობა.
"ჩვენ არ გვქონდა პრეზიდენტის ბრძანებულება, რომელიც ხელფასებს არეგულირებს. ეს ბრძანებულება 2010 წლის აგვისტოში მივიღეთ და ამ პერიოდიდან გავზარდეთ თანამშრომლების ხელფასები. ადმინისტრაციული ხარჯების გაზრდა სწორედ ამან გამოიწვია", - განაცხადა მაილაშვილმა.
მომავალი წლის ბიუჯეტის პროექტში 6 900 ლარით არის შემცირებული სოციალურად დაუცველი მოსახლეობის დახმარების პაკეტი. თანხა საერთოდ არ არის გათვალისწინებული სარწყავი არხების შეკეთებაზე, ნაპირსამაგრ სამუშაოზე და საკანალიზაციო სისტემის მოწყობაზე, რამაც მოქალაქეების უკმაყოფილება გამოიწვია.
მაილაშვილის თქმით, სარწყავი არხების და საკანალიზაციო სისტემის მოწყობა გამგეობის კომპეტენცია არ არის და კერძო კომპანიებს ევალება.
ახმეტის მუნიციპალიტეტის საკრებულო 2011 წლის ბიუჯეტს, სავარაუდოდ, 30 დეკემბერს დაამტკიცებს.