ათიათასობით პროპალესტინელი დემონსტრანტი კვლავ გამოვიდა ლონდონის ცენტრალურ ქუჩებში. ისინი ღაზაში მუდმივი ცეცხლის შეწყვეტის მოთხოვნით ვესტმინსტერისკენ გაემართნენ, სადაც მთავარი სამთავრობო შენობებია განთავსებული.
აქციის მონაწილეები სკანდირებდნენ „თავისუფლება პალესტინას“.
ადგილზე მობილიზებული იყო პოლიციელების დიდი რაოდენობა, რომელთაგან ზოგიერთი არიგებდა გამაფრთხილებელ ბროშურებს, რომ აქციაზე იკრძალებოდა ჰამასის მხარდაჭერა და რელიგიური სიძულვილის გამოხატულება.
მარშის ორგანიზატორები აცხადებდნენ, რომ ამის საჭიროებას ვერ ხედავდნენ, მათივე თქმით, ისინი მხოლოდ ეწინააღმდეგებოდნენ რასიზმის ყველა ფორმით გამოხატვას.
ლონდონის პოლიციამ განაცხადა, რომ ორი ადამიანი დააკავეს აკრძალული ორგანიზაციის მხარდაჭერისთვის, ხოლო ოთხი მოქალაქე, რომელიც ავრცელებდა ლიტერატურას სვასტიკით დავითის ვარსკვლავის შიგნით, დააკავეს რასობრივი სიძულვილის გაღვივებისთვის.
