ჩრდილოეთ მაკედონიამ, რომელიც ნატო-ს წევრია, განაცხადა, რომ ის გააუქმებს მომავალ კვირას რუსეთთან ფრენების აკრძალვას, რაც რუსეთის საგარეო საქმეთა მინისტრს სერგეი ლავროვს მისცემს უფლებას დაესწროს ქვეყანაში საერთაშორისო კონფერენციას. იუწყება Associated Press.
მთავრობის განცხადებაში ნათქვამია, რომ ღია ფანჯარა 29 ნოემბრიდან 1 დეკემბრამდე იმოქმედებს, როდესაც ჩრდილოეთ მაკედონია სკოპიეში ეუთო-სსაგარეო საქმეთა მინისტრების შეხვედრას უმასპინძლებს.
ჩრდილოეთ მაკედონიის მთავრობაში აცხადებენ, რომ გადაწყვეტილება შეესაბამება ევროკავშირის რეგლამენტს, რომელიც საერთაშორისო კონფერენციების დროს, რუსეთი მიმართ დაწესებული შეზღუდვებიდან გამონაკლისის დაშვებას ითვალისწინებს.
რუსეთი ეუთოს 57 წევრიდან ერთ-ერთია. ეუთოს წელს ჩრდილოეთ მაკედონია თავმჯდომარეობს.
როგორც ცნობილია, ევროპის ქვეყნების უმეტესობამ 2022 წლის თებერვალში უკრაინაში შეჭრის შემდეგ რუსეთთან ფრენები აკრძალა.
გაურკვეველია მიიღებს თუ არა ლავროვი მოწვევას, რომელიც ჩრდილოეთ მაკედონიის საგარეო საქმეთა მინისტრის თქმით, მას გასულ კვირას გაუგზავნეს.
4 ნოემბერს საგარეო საქმეთა მინისტრის მოადგილემ ალექსანდრე გრუშკომ განაცხადა, რომ რუსეთი მიწვეული იყო ეუთო-ს ქვეყნების საგარეო საქმეთა მინისტრთა საბჭოზე.
იმისათვის, რომ რუსეთის დელეგაციამ იმ ქვეყნამდე მიაღწიოს, რომელსაც ზღვაზე გასასვლელი არ აქვს, მოუწევს შევიდეს ნატო-სა და ევროკავშირის სხვა წევრების საჰაერო სივრცეში, რისთვისაც ნებართვა დასჭირდება.
Associated Press-ი აღნიშნავს, რომ ბელარუსის გარდა, უკრაინაში ომის დაწყების შემდეგ ლავროვი არცერთ ევროპულ ქვეყანაში არ ყოფილა. ის ეწვია თურქეთს (ნატო-ს წევრი), სადაც რუსული ფრენების აკრძალვა არ არსებობს და ასევე გამართა შეხვედრები ნიუ-იორკში გაეროს შტაბ-ბინაში.
