შეერთებული შტატების ცენტრალურმა სარდლობამ განაცხადა, რომ აშშ-მა იემენში ჰუსიტების მიერ კონტროლირებადი ტერიტორიიდან გაშვებული რამდენიმე დრონი ჩამოაგდო.
„დრონები ჩამოვაგდეთ იმ დროს, როცა ამერიკული ხომალდი წითელ ზღვაში პატრულირებდა. გემს და ეკიპაჟს არანაირი დაზიანება არ მიუღიათ“, - ნათქვამია სარდლობის განცხადებაში.
შეერთებულმა შტატებმა რამდენიმე დღის წინ განაცხადა, რომ განიხილავს იემენელი აჯანყებულების ტერორისტულ ორგანიზაციად გამოცხადებას მას შემდეგ, რაც მათ წითელ ზღვაში სატვირთო გემი Galaxy Leader გაიტაცეს.
გემი დაცურავს ბაჰამის კუნძულების დროშის ქვეშ, ეკუთვნის ბრიტანულ ფირმას და მართავს იაპონური კომპანია, რომელსაც აქვს კავშირები ისრაელელ ბიზნესმენთან.
მის ბორტზე ეკიპაჟის 20-ზე მეტი წევრი იმყოფებოდა - ისინი დააკავეს, გემი კი იემენის სანაპიროზე გადაიყვანეს, სადაც ის დღემდე იმყოფება.
ჰუსიტებმა განაცხადეს, რომ გემის გატაცება შურისძიება იყო ღაზაში ისრაელის ომისთვის. შეერთებულმა შტატებმა მას საერთაშორისო სამართლის უხეში დარღვევა უწოდა, ხოლო ისრაელმა განაცხადა, რომ გემის გატაცებას ირანი ხელმძღვანელობდა.
