"საქართველოს ბანკმა" დღეს 2010 წლის მაჩვენებები შეაჯამა. ბანკის გენერალური დირექტორის ირაკლი გილაურის განმარტებით, 2010 წელი "საქართველოს ბანკისთვის" წარმატებული წელი იყო. გილაურის ინფორმაციით, 2010 წლის მესამე კვარტალში ბანკის წმინდა მოგებამ 23,7 მილიონი ლარი შეადგინა, რაც 118,7%-ით აღემატება 2009 ანალოგიური პერიოდის მაჩვენებელს. "საქართველოს ბანკის" მთლიანმა შემოსავალმა 2010 წლის მესამე კვარტლის მდგომარეობით, 75 მილიონი ლარი შეადგინა, რაც 22%-ით მეტია 2009 წლის ანალოგიურ პერიოდთან შედარებით.
გარდა ამისა, "საქართველოს ბანკის" მთლიანი აქტივები მიმდინარე წლის მე-3 კვარტლის მონაცემებით, 28%-ით გაიზარდა და 3,5 მილიარდ ლარზე მეტი შეადგინა. მიმდინარე წლის სამი კვარტლის მონაცემებით კი, საქართველოს ბანკს" 2 მილიარდ ლარზე მეტი სესხი აქვს გაცემული, რაც 2009 წლის ანალოგიურ პერიოდთან შედარებით 25%-ით მეტია.
2010 წელს უპრეცედენტოდ გაიზარდა კლიენტთა დეპოზიტები და მე-3 კვარტალში 1,5 მილიარდ ლარზე მეტი შეადგინა, რაც 43%-ით მეტია 2009 წლის ანალოგიურ პერიოდთან შედარებით. 2010 წლის განმავლობაში "საქართველოს ბანკმა" 150 მილიონი დოლარი მოიზიდა საერთაშორისო ფინანსური ინსიტუტებიდან, მათ შორის 50 მილიონი დოლარი ევროპის რეკონსტრუქციისა და განვითარების ბანკიდან, 50 მილიონი - აზიის განვითარების ბანკიდან და 50 მილიონი - სამხრეთ-აღმოსავლეთ ევროპის ეროვნული ფონდისგან.
მიღებული დაფინანსება კი ბანკმა ძირითადად, მცირე და საშუალო ბიზნესის დაკრედიტებას მოახმარა და ბაზრის ამ სეგმენტზე ბანკის პოზიციები კიდევ უფრო გაამყარა. გარდა ამისა, 2010 წლის განმავლობაში მნიშვნელოვნად გაიზარდა ლონდონის საფონდო ბირჟაზე "საქართველოს ბანკის" აქციები და 2010 წლის იანვრის დასაწყისში აქციები 8,35 დოლარი ღირდა, 2010 წლის ნომბრის ბოლოს კი, აქციის ფასმა 18 აშშ დოლარი შეადგინა.
გარდა ამისა, მიმდინარე წლის განმავლობაში "საქართველოს ბანკმა" მომხმარებელს რამდენიმე ახალი პროდუქტი შესთავაზა. მათ შორის, საკრედიტო "ამერიკან ექსპრესის" ბარათი "ამერიკან ბლუ ქარდი".
"საქართველოს ბანკმა" ასევე ახალი პირობები დაამკვირდა ავტოგანვადების ბაზარზე. კლიენტს ავტოსალონში მისვლისას შეუძლია არა მხოლოდ ჩაანაცვლოს ძველი ავტომობილი ახლით, არამედ ისარგებლოს სესხით და სრულიად უსასყიდლოდ გასინჯოს და მოირგოს ავტომანქანების უახლესი მოდელები. ამ პროექტის ფარგლებში, "საქართველოს ბანკმა", თითქმის, 2 მილიონი ლარის სესხი გასცა.
ასევე "საქართველოს ბანკის" სახელფასო პროგრამაში ჩართულ მომხმარებელს ბანკმა შესთავაზა "სმს სესხი", რომლის ფარგლებშიც "საქართველოს ბანკმა" მინიმუმ, 4,5 მილიონ ლარზე მეტი სესხი გასცა.
"საქართველოს ბანკი", ასევე წლის განმავლობაში ახორციელებდა საქველმოქმედო პროექტს - "მეოცნებე ბავშვები". პროქეტის ფარგლებში 9 მზრუნველობამოკლებული ბავშვის სახელზე ბანკმა გახსნა ანაბრები, თითოეული 1000 ლარის მოცულობით და ბავშვების სრულწლოვანობამდე ანაბარზე ყოველთვიურად 50 ლარს ამატებს