ფინანსთა სამინისტროსა და კომერციულ ბანკებს შორის დღეს ხელი მოეწერა შეთანხმებას, რომლის მიზანია საბანკო კრედიტებზე ხელმისაწვდომობისა და კეთილსინდისიერი გადამხდელების წახალისების გზით ხელი შეუწყოს ქვეყნის ეკონომიკურ განვითარებასა და საკრედიტო აქტივობის ზრდას.

"ფინანსთა სამინისტრო კომერციულ ბანკებს კარგ გადამხდელებზე ყოველთვიურად დეტალურ ინფორმაციას მიაწვდის იმ გადამხდელებზე, რომელიც დაჯილდოვებულნი არიან "პატიოსანი გადახდელის სერთიფიკატებით". ამის შემდეგ ბანკები ივარაუდობენ, რომ ამ გადამხდელებთან ურთიერთობა გაუადვილდებათ. კარგი გადამხდელებისთვის საკრედიტო რესურსი უფრო ხელსაყრელი უნდა იყოს. როდესაც საუბარია პროექტების დაფინანსებაზე, კომერციული ბანკები დიდ ყურადღებას უთმობენ საგადასახადო რისკებს. როდესაც პატიოსან გადახდელს ნდობას უცხადებს სახელმწიფო, ბუნებრივია რისკი დაბალია და ბანკებისთვის ადვილია ასეთი ტიპის გადამხედელებთან ურთიერთობა. შესაბამისად, სხვადასხვა ზომის პროექტების დაფინანსება. კარგი გადახდელებისთვის "პატოსანი გადახდელის სერთიფიკატის" გადაცემა, როგორც იცით, "ახალი კურსის" ნაწილია",- განაცხადა კახა ბაინდურაშვილმა.

შეგახსენებთ რომ 17 დეკემბერს საქართველოს პრემიერ-მინისტრმა ნიკა გილაურმა 5 ქართული კომპანიას, რომლებსაც კარგი საგადასახადო ისტორია აქვთ: შპს „შარავანდს", შპს „ფეშენ ჰაუზს", შპს „ხაშმს", შპს „დაგი-777-ს" და ი/მ „ტარიელ გოგიტიძეს" - „პატიოსანი გადამხდელის სერტიფიკატი" გადასცა.

კეთილსინდისიერი და პატიოსანი გადამხდელის მოტივირებისთვის საქართველოს მთავრობა „პატიოსანი გადამხდელის სერტიფიკატის" გადაცემის ინიციატივით გამოდის. ეს პირველი შემთხვევაა, როდესაც მთავრობა ბიზნესს თანამშრომლობისთვის ასეთი ფორმით აჯილდოვებს.

პატიოსანი გადამხდელი პირნათლად ასრულებს საგადასახადო ვალდებულებებს. მისი ურთიერთობა სახელმწიფოსთან ღია და ტრანსპარეტულია. ასეთი გადამხდელების მიერ გადახდილი გადასახადები ხმარდება ჩვენი საზოგადოებისთვის ყველაზე პრიორიტეტულ და სასიცოცხლო მნიშვნელობის პროგრამებს: პენსიონერებისა და პედაგოგების დაფინანსებას; ჯანდაცვისა და სოციალურ პროგრამებს; განათლებას; საზოგადოებრივი წესრიგის უზრუნველყოფას; ქვეყნის უსაფრთხოებას; კულტურული მემკვიდრეობის დაცვას და ა.შ.
„პატიოსანი გადამხელის სერტიფიკატს" მქონე კომპანია მეტი ნდობით ისარგებლებს სახელმწიფოს მხრიდან. მისი მონაცემები მოხვდება ფინანსთა სამინისტროს შემოსავლების სამსახურის მონაცემთა ერთიან ბაზაში, ასევე დაბალი რისკის მქონე კომპანიების სიაში. ახალი საგადასახადო კოდექსის მიხედვით კი, ფინანსთა სამინისტროს სისტემაში არსებული დავების განხილვის საბჭოში შესაძლებელია მოხდეს „პატიოსანი გადამხდელის სერტიფიკატის" მქონე კომპანიისთვის დარიცხული თანხების გაუქმება, თუკი სამართალდარღვევა შეცდომამ გამოიწვია.

პირველი ხუთი ქართული კომპანიისთვის „პატიოსანი გადამხდელის სერტიფიკატის" გადაცემის შემდეგ, საქართველოს მთავრობა იმედოვნებს, რომ მათი რიცხვი სწრაფად გაიზრდება და პატიოსანი საქმიანობა, უკეთესი ბიზნესგარემოს შექმნა, სახელმწიფოსა და ბიზნესის საერთო ინტერესი გახდება.

მთავრობის ინიციატივა „ახალი კურსის" შემადგენელი ნაწილია, რომელიც გულისხმობს ქვეყანაში სამართლიანი, მარტივი და სანდო საგადასახადო სისტემის შექმნას.