"რუსეთის საოკუპაციო რეჟიმს მოუწევს ოკუპირებულ ტერიტორიებთან მიმართებაში რეზოლუციების შესრულება", - ამის შესახებ საქართველოს ტერიტორიული მთლიანობის აღდგენის დროეითი საპარლამენტო კომისიის თავმჯდომარე შოთა მალაშხიამ აფხაზი სეპარატისტების მიერ გალის ოკუპირებული რაიონის საზღვრების შეცვლის შეფასებისას აღნიშნა.
"პროვოკაციები ამ თვალსაზრისით მოსალოდნელია, თუმცა ამ მომენტში, არამგონია, რუსული მხარე ასეთ პროვოკაციაზე წავიდეს, რადგან მოსკოვის მიმართ ევროპის მიდგომა უფრო გამკაცრდება", - განმარტა დეპუტატმა.
მისივე შეფასებით, რუსეთი და სოხუმის მარიონეტული რეჟიმი იძულებული გახდება უახლოეს მომავალში საერთაშორისო თანამეგობრობის რეზოლუციები შეასრულოს, რასაც ის მომავალი წლისთვის ვარაუდობს.
როგორც ცნობილია, აფხაზეთის სეპარატისტული რეჟიმი გალის რაიონის ძველ ადმინისტრაციულ საზღვრებში აღდგენას ცდილობს. აღნიშნული გადაწყვეტილება სოხუმის რეჟიმმა მიიღო და გალის რაიონის ნაწილი ტყვარჩელის და ოჩამჩირის რაიონს მიუერთა.
არსებული ინფორმაციით, რუსი ოკუპანტების და აფხაზი სეპარატსტების გადაწყვეტილებით გალის რაიონში მხოლოდ ქართველ მოსახლებას დატოვებენ, რომ შემდეგ საერთაშორისო თანამეგობრობასთან ვაჭრობის საგნად გამოიყენონ.