კომპანია "თელასმა" 2010 წლის შედეგები შეაჯამა. შედეგების თანახმად, გასული წელი კომპანიისთვის წარმატებული იყო - გაუმჯობესებულია როგორც ტექნიკური, ასევე ფინანსური მაჩვენებლები. წარმატებული მუშაობისთვის კომპანიის გენერალურმა დირექტორმა იური პიმონოვმა 100 თანამშრომელი სიგელებითა და ფულადი პრემიებით დააჯილდოვა.
2010 წლის 11 თვეში "თელასის" მიერ საწარმოო და არასაწარმოო სფეროში ჩადებულმა ინვესტიციების მოცულობამ 24 მილიონი ლარი შეადგინა.
ამ თანხიდან 13 მილიონ ლარზე მეტი გამანაწილებელი ქსელის რეკონსტრუქცია-რეაბილიტაციისა და ელექტროენერგიის აღრიცხვის სისტემის გაუმჯობესების პროექტების განხორციელებაზე დაიხარჯა.
კომპანია "თელასის" მუშაობის მთავარი პრიორიტეტბია გამანაწილებელი ქსელის ტექნიკური თვალსაზრისით ყველაზე სუსტი სეგმენტების რეაბილიტაცია და მოდერნიზაცია. ამგვარი პროექტების განსახორციელებლად აღნიშნულ პერიოდში კომპანიამ 8 მილიონ 938 ათასი ლარი უკვე დახარჯა.
კერძოდ, დასრულდა ან დასრულების სტადიაში იმყოფება ისეთი სამუშაოები როგორებიცაა, უსადენო კავშირის მოწყობა ელექტროენერგიის კომერციული აღრიცხვის ავტომატიზებული სისტემის დასანერგად; ოთხ მაღალი ძაბვის გამანაწილებელ ქვესადგურში ("დინამო", "საბურთალო-1", "საბურთალო-3", "ლილო-1") 35/6 კილოვილტიანი გამანაწილებელი მოწყობილობების რეკონსტრუქცია; ცენტრალური გამანაწილებელი პუნქტის "5000" სრული რეკონსტრუქცია; ოცდახუთ 10/6 კილოვოლტიან ქვესადგურებში ძალოვანი ტრანსფორმატორების შეცვლა; 30-ზე მეტ სატრანსფორმატორო ქვესადგურებში 150 უჯრედის შეცვლა; 35/10/6/0,4 კილოვოლტიანი ამორტიზებული საკაბელო ელექტროგადამცემი ხაზების განახლება (სულ 50,5 კილომეტრი); ელექტრომომარაგების ქსელის მოწესრიგება თბილისსა და მის შემოგარენში.
რაც შეეხება აბონენტთა ქსელის გაფართოებასა და ელექტროენერგიის აღრიცხვის სისტემის გაუმჯობესებას, ამ პროექტების განსახორციებლად 2010 წლის 11 თვეში კომპანიამ 4 მილიონ 163 ათასი ლარი დახარჯა.
კერძოდ, სახელმწიფოს მიერ დევნილებისთვის საკუთრებაში გადაცემულ საცხოვრებელ ადგილებში ინდივიდუალური გამრიცხველიანების პროცესს "თელასი" წინსწრები ტემპით ახორციელებს. 2010 წლის განმავლობაში გეგმით გათვალისწინებული 6200 გასამრიცხველიანებელი აბონენტის ნაცვლად კომპანიამ ელექტროენერგიის ინდივიდუალური აღრიცხვის კვანძი 7507 დევნილ ოჯახს მოუწყო, რომლიდანაც 5089 ერთეული "თელასის" ერთიან მონაცემთა ბაზაში უკვე აისახა. Aამ სამუშაოების განსახორციელებლად კომპანიამ წელს 3 მილიონ 94 ათასი ლარი დახარჯა. საქართველოს მთავრობასთან მოლაპარაკების თანახმად, თბილისში მცხოვრები 9600 დევნილი ოჯახის ინდივიდუალური გამრიცხველიანების პროცესი "თელასმა" 2011 წლის მაისამდე უნდა დაასრულოს. Pპროექტის განხორციელება დევნილ მოსახლეობის მიერ მოხმარებული ელექტროენერგიის აღრიცხვისა და მისი საფასურის გადახდის საკითხს საბოლოოდ მოაწესრიგებს.
ყველა ზემოხსენებული სამუშაოების ჩატარების შედეგად, გაიზარდა აბონენტების ენერგომომარაგების საიმედოობა, შემცირდა ელექტროენერგიის ტექნიკური და კომერციული დანაკარგების ოდენობა. 2010 წლის 11 თვის მონაცემებით 2009 წლის ანალოგიურ პერიოდთან შედარებით ქსელში დაფიქსირებული ტექნიკური ინციდენტების რიცხვი 25%-ით, ხოლო ელექტროენერგიის დანაკარგების საერთო მაჩვენებელი 15,9%-დან 14,53-მდე შემცირდა. აღსანიშნავია, რომ იმ პერიოდში როდესაც "ინტერ რაო ეესი" "თელასის" მფლობელი გახდა კომპანიის ელექტროენერგიის საერთო დანაკარგები 38%-ს შეადგენდა.
მნიშვნელოვანი ზრდაა დაფიქსირებული ელექტროენერგიის რეალიზაციის კუთხითაც. 2010 წლის იანვარ-ნოემბერში "თელასის" შემოსავლებმა ელექტროენერგიის რეალიზაციიდან 19 მილიონი ლარით გადააჭარბა დაგეგმილ მაჩვენებელს და 213 მილიონი ლარი შეადგინა (დრღ-ს გარეს), ხოლო 2009 წლის 11 თვის ანალოგიურ მონაცემთან შედარებით, კომპანიამ 14 მილიონი ლარით მეტი შემოსავალი მიიღო.
გამანაწილებელი ქსელის რეაბილიტაციის და მოდერნიზების პროცესი მომავალ წელსაც გაგრძელდება. 2011 წელს კომპანიის განვითარებისთვის "თელასი" 21 მილიონი ლარის ინვესტიციას გეგმავს.
კომპანია "ინტერ რაო ეესის" საქართველოში მოღვაწეობის მთელი პერიოდის განმავლობაში "თელასის" განვითარებაში ჩადებული ინვესტიციების სრულმა მოცულობამ 170 მილიონ ლარამდე შეადგინა.
2003 წლის 1 სექტემბრიდან კომპანია "ინტერ რაო ეესის" მფლობელობაში გადავიდა თბილისის ელექტროგამანაწილებელი კომპანიის სს "თელასის" აქციების 75%, თბილსრესის მე-9 ენერგობლოკი (სს "მტკვარი ენერგეტიკა") და სს "ეიეს ტრანსენერჯი", რომელიც თურქეთში ელექტროენერგიის ექსპორტის განსახორციელებლად შეიქმნა. აგრეთვე, მას მიენიჭა ჰიდროელექტროსადგურების "ხრამი-1" და "ხრამი-2" მართვის უფლება. გარდა ამისა, "ინტერ რაო ეესის" საკუთრებაშია ერთობლივი საწარმოს "საქრუსენერგოს" 50%-ანი წილი.