ეროვნული ბანკის პრეზიდენტის მოვალეობის შემსრულებელმა, ნათია თურნავამ და ვიცე-პრეზიდენტმა, არჩილ მესტვირიშვილმა, სომხეთის ეროვნული ვალუტის - დრამის 30 წლის საიუბილეო ღონისძიებაში მიიღეს მონაწილეობა. მაღალი რანგის სიმპოზიუმი, დილიჟანში, სომხეთის ცენტრალური ბანკისა და "ბრეტონ ვუდსის კომიტეტის" ორგანიზებით გაიმართა. სიმპოზიუმს ესწრებოდნენ კავკასიისა და ცენტრალური აზიის რეგიონის ცენტრალური ბანკები, ასევე მთავრობის, საფინანსო სექტორის, აკადემიური და სამეცნიერო წრეების წარმომადგენლები.
ნათია თურნავამ სიმპოზიუმის მონაწილეებს მონეტარული პოლიტიკის ჩარჩოს განვითარებასთან დაკავშირებით საქართველოს გამოცდილება გაუზიარა. ასევე ისაუბრა მაღალინფლაციური გარემოს გამოწვევებსა და დოლარიზაციის შესამცირებლად გადადგმულ ნაბიჯებზე.
"ბოლო წლების გამოცდილებამ ცხადყო, რომ ინფლაციის თარგეთირება და მცურავი გაცვლითი კურსი საუკეთესო პრაქტიკაა ისეთ უპრეცედენტო ეკონომიკურ შოკებთან გასამკლავებლადაც კი, როგორიც იყო პანდემია და რუსეთის შეჭრა უკრაინაში. შედარებისთვის, თუ შარშან ზაფხულში საქართველოში ინფლაცია თითქმის 14%-ს შეადგენდა, ახლა ის თანდათან მცირდება და 2023 წლის ივლისში მხოლოდ 0.3% შეადგინა. წლიური ინფლაციის მაჩვენებელი ეტაპობრივად დაუახლოვდება მიზნობრივ 3%-ს, რაც ადასტურებს, რომ ეროვნული ბანკის მონეტარული პოლიტიკა და კომუნიკაცია ეფექტიანია", - აღნიშნა ნათია თურნავამ.
შეხვედრის მონაწილეებმა ციფრული ვალუტის სამომავლო პერსპექტივებსა და დიჯიტალიზაციის პროცესის მიმდინარეობაზე იმსჯელეს. საუბარი აგრეთვე შეეხო ახალ ეკონომიკურ გამოწვევებს, როგორიცაა კლიმატური ცვლილებები, ომის თანმდევი მიგრაცია და კაპიტალის ჭარბი შემოდინება და ცენტრალური ბანკების როლი აღნიშნული რისკების მინიმიზაციაში.
ვიზიტის ფარგლებში, ეროვნული ბანკის პრეზიდენტის მოვალეობის შემსრულებელმა გაცნობითი ხასიათის შეხვედრები გამართა სომხეთის, უზბეკეთის და ყაზახეთის ცენტრალური ბანკების მმართველებთან. შეხვედრაზე მხარეებმა თანამშრომლობის გაღრმავების პერსპექტივებზე ისაუბრეს.
