რუსეთის ბავშვთა უფლებების დამცველი მარია ლვოვა-ბელოვა, რომლის დაპატიმრებაზეც ვლადიმირ პუტინთან ერთად, სისხლის სამართლის საერთაშორისო სასამართლომ ორდერი გასცა, უკრაინას ადანაშაულებს, რომ მან უკრაინელი ბავშვების ევაკუაცია არ მოახდინა. მან ამის შესახებ ამერიკულ გამოცემა Vice-თან ინტერვიუში განაცხადა.
მისი თქმით, რუსეთი არ აღიარებს სისხლის სამართლის საერთაშორისო სასამართლოს იურისდიქციას. მისივე თქმით, ჟენევის კონვენციის თანახმად, უბედურების ზონიდან ბავშვების გაყვანის ვალდებულება ჰქონდა. ჟურნალისტის შეკითხვაზე, რატომ არ დაიცვა რუსეთმა ჟენევის კონვენცია, რომლის თანახმად, ევაკუაცია მესამე ქვეყნის ტერიტორიაზე უნდა მომხდარიყო, ლვოვა-ბელოვამ განაცხადა, რომ დონეცკისა და ლუჰანსკის ე.წ. რესპუბლიკები რუსეთის მიერ აღიარებული ცალკე სახელმწიფოებია.
ლვოვა-ბელოვა გამოცემასთან ინტერვიუში ამბობს, რომ რუსეთს დაბომბვების ქვეშ მყოფი ბავშვები გაიყვანა და გადაარჩინა. შეკითხავს, რომ სწორედ რუსეთმა დაიწყო მარიუპოლისა და სხვა უკრაინული ქალაქების დაბომბვა, მან ასე უპასუხა: „უკრაინამ არაფერი გააკეთა მარიუპოლიდან ბავშვების ევაკუაციისათვის. სად იყო ჰუმანიტარული დერეფნები? სად იყო ბავშვების ევაკუაცია? იგივე ხდება ბახმუტშიც“.
მისივე თქმით, ბავშვები, რომლებსაც მისცეს რუსული პასპორტები, უკრაინის მოქალაქეებად რჩებიან. „როგორ შეიძლება მოქალაქეობამ იდენტობა წაშალოს? ჩვენ ყოველთვის ერთად ვმღეროდით სიმღერებს რუსულ და უკრაინულ ენებზე. ჩვენ ვყვებოდით ზღაპრებს რუსულ და უკრაინულ ენებზე. ჩვენ ყოველთვის ვცხოვრობდით მეგობრულად. ახლა კი რა ხდება - პირიქით, უკრაინაში შლიან ყველაფერს, რაც რუსეთთან არის დაკავშირებული“, - თქვა ლვოვა-ბელოვამ.
