მოლდოვის საგარეო საქმეთა სამინისტროში რუსეთის ელჩი ოლეგ ვასნეცოვი, რუსეთის ხელისუფლების წარმომადგენლების მხრიდან გაკეთებული განცხადებების გამო დაიბარეს.
მოლდოვური მედიის ინფორმაციით, მოლდოვის საგარეო უწყების პროტესტი მოჰყვა რუსეთის უშიშროების საბჭოს თავმჯდომარის მოადგილის, დიმიტრი მედვედევის კომენტარს, რომელშიც განაცხადა, რომ მოლდოვა, როგორც ქვეყანა, უკვე აღარ არსებობს, რადგან ის რუმინეთს მიჰყიდეს.
მოლდოვის საგარეო საქმეთა სამინისტროში რუსეთის ოფიციალური პირების განცხადებებს აბსოლუტურად მიუღებელი და მოლდოვისა და ევროკავშირის მიმართ ცილისმწამებლური უწოდეს.
მანამდე, მოლდოვის პრემიერ-მინისტრმა დორინ რეჩანმა განაცხადა, რომ ვლადიმირ პუტინს მოლდოვაში შესვლა აეკრძალა. მისი თქმით, მოლდოვაში არსებობს შავი სია რუსეთის მოქალაქეების, რომლებიც ქვეყანაში მოხვედრას ვერ შეძლებენ, ამასთან, მისი თქმით, ზოგიერთი თანამდებობის პირი ამის შესახებ მხოლოდ მაშინ შეიტყობს, როდესაც მოლდოვაში შესვლას შეეცდება.
