დიდმა ბრიტანეთმა დაგმო რუსი ოპოზიციონერისა და კრემლის კრიტიკოსის ვლადიმირ ყარა-მურზას პოლიტიკურად მოტივირებული განაჩენი.
მას შემდეგ, რაც კრემლის კრიტიკოს მოსკოვის სასამართლომ 25 წლით პატიმრობა მიუსაჯა, დიდი ბრიტანეთის საგარეო საქმეთა სამინისტრომ რუსეთის ელჩი დაიბარა.
„ვლადიმირ ყარა-მურზამ გაბედულად დაგმო უკრაინაში რუსეთის შეჭრა, რაც საერთაშორისო სამართლისა და გაეროს წესდების უხეში დარღვევა იყო. რუსეთის მხრიდან ადამიანის ფუნდამენტური უფლებების, აზრის გამოხატვის თავისუფლების უგულებელყოფა შეშფოთებას იწვევს. ჩვენ გავაგრძელებთ რუსეთის მოწოდებას დაიცვას საერთაშორისო ვალდებულებები, მათ შორის ვლადიმირ ყარა-მურზას სათანადო სამედიცინო დახმარების მიღების უფლება“, - განაცხადა დიდი ბრიტანეთის საგარეო საქმეთა მინისტრმა ჯეიმს კლევერლიმ.
კლევერლის თქმით, დიდი ბრიტანეთი გააგრძელებს ოპოზიციონერი პოლიტიკოსის ახლობლების მხარდაჭერას და კრემლს მისი დაუყოვნებლივ გათავისუფლებისკენ მოუწოდებს.
41 წლის ვლადიმირ ყარა-მურზას რუსეთისა და დიდი ბრიტანეთის მოქალაქეობა აქვს. მას ბრალად რუსული არმიის დისკრედიტაცია, რუსეთში არასასურველ ორგანიზაციებთან თანამშრომლობა და სახელმწიფოს ღალატი დასდეს.
უკრაინაში ომის გაკრიტიკების გარდა, ყარა-მურზა ასევე ღიად საუბრობდა პრეზიდენტ ვლადიმირ პუტინის მიერ განსხვავებული აზრის ჩახშობის შესახებ.
წლების განმავლობაში პუტინის და რუსეთის ხელისუფლების წევრების წინააღმდეგ სანქციების დაწესებას ლობირებდა.
ვერდიქტის გამოცხადებამდე რამდენიმე საათით ადრე ყარა-მურზამ „სიენენთან“ ინტერვიუში განაცხადა, რომ რუსეთს „მკვლელების რეჟიმი“ მართავს.
სასამართლოს წინაშე საბოლოო სიტყვაში ყარა-მურზამ სასამართლო სტალინის რეჟიმის საჩვენებელ სასამართლო პროცესებს შეადარა და განაცხადა, რომ მოსამართლეებს მის გამართლებას არ სთხოვს.
2015 და 2017 წელს ვლადიმირ ყარა-მურზამ რუსეთის სპეცსამსახურები მის მოწამვლაში დაადანაშაულა. მისი მოწამვლის ფაქტზე სისხლის სამართლის საქმე არ აღძრულა.
