პოლონეთმა და უნგრეთმა უკრაინიდან მარცვლეულისა და სხვა საკვები პროდუქტების იმპორტის აკრძალვის გადაწყვეტილება მიიღეს. იუწყება Reuters.
ხსენებული გადაწყვეტილება პოლონეთისა და უნგრეთის მთავრობებმა ადგილობრივი აგრარული სექტორის დასაცავად მიიღეს, მას შემდეგ, რაც უკრაინიდან მიწოდების ინტენსივობამ შეამცირა ფასები მთელ რეგიონში.
"დღეს მთავრობამ მიიღო გადაწყვეტილება რეგულაციის შესახებ, რომელიც კრძალავს პოლონეთში მარცვლეულის შემოსვლას, იმპორტს, ასევე ათეულობით სხვა სახის საკვების [უკრაინიდან} შემოტანას“, - თქვა პოლონეთის მმართველი პარტიის „კანონი და სამართლის“ ლიდერმა, იაროსლავ კაჩინსკიმ.
პოლონეთის გადაწყვეტილებას უნგრეთის პრემიერ-მინისტრის, ვიქტორ ორბანის მთავრობაც შეუერთდა. ამასთან, უნგრეთს ჯერ არ უთქვამს, როდის შევა აკრძალვა ძალაში, თუმცა მთავრობაში აღნიშნეს, რომ ის ივნისის ბოლომდე იმოქმედებს.
უნგრეთის ხელისუფლება იმედოვნებს, რომ მოხდება ევროკავშირის დონეზე რეგულაციების შეცვლა.
რუსეთის ინტერვენციის შედეგად შავი ზღვის პორტების ბლოკირების გამო უკრაინული მარცვლეულის დიდი ნაწილი, რომელიც ევროკავშირის ქვეყნებში წარმოებულზე იაფია, ცენტრალური ევროპის ქვეყნებში გადის, რაც ადგილობრივი ფერმერების ფასებსა და გაყიდვებზე აისახა.
უკრაინამ პოლონეთის გადაწყვეტილების გამო წუხილი გამოთქვა და აღნიშნა, რომ სხვადასხვა საკითხის ცალმხრივი რადიკალური ქმედებებით გადაჭრა სიტუაციის დადებით მოგვარებას არ დააჩქარებს.
