მსოფლიო ლიდერები, მათ შორის რუსეთის პრეზიდენტი ვლადიმირ პუტინი, ჩარლზ მესამეს ულოცავენ გაერთიანებული სამეფოს სუვერენად ოფიციალურად გამოცხადებას.
"გთხოვთ, მიიღოთ ჩემი გულწრფელი მოლოცვა გამეფებასთან დაკავშირებით. თქვენს უდიდებულესობას წარმატებას, ჯანმრთელობასა და ყოველივე საუკეთესოს ვუსურვებ", - ნათქვამია პუტინის მილოცვაში.

დღეს, ლონდონში, წმინდა ჯეიმსის სასახლეში მემკვიდრეობის საბჭომ ჩარლზ III ოფიციალურად გამოაცხადა გაერთიანებული სამეფოსა და თანამეგობრობის წევრი ქვეყნების მეფედ და რწმენის დამცველად (ანგლიკანური ეკლესიის მეთაურად).
მემკვიდრეობის საბჭოს შემადგენლობაში შედიან სამეფოს ოჯახის წევრები, უელსის პრინცი, ტახტის მემკვიდრე უილიამი, დედოფალი კონსორტი კამილა, კენტერბერის არქიეპისკოპოსი, ბრიტანეთის მოქმედი და ყოფილი პრემიერ-მინისტრები, მთავრობის კაბინეტის წევრები და დიდი ბრიტანეთის მაღალი პოლიტიკური საზოგადოების არაერთი წარმომადგენელი.
მეფე ჩარლზის კორონაცია ვესტმინსტერის სააბატოში მოგვიანებით გაიმართება. კორონაციის თარიღი ჯერჯერობით არ არის განსაზღვრული.
ჩარლზი გაერთიანებული სამეფოს მეფე გახდა 8 სექტემბერს, დედის, დედოფალ ელისაბედ მეორის გარდაცვალებისთანავე.
დედოფალი ელისაბედ II 8 სექტემბერს შოტლანდიაში, ბალმორალის ციხე-სიმაგრეში გარდაიცვალა. ელისაბედ II-ის დაკრძალვის ცერემონია გაიმართება ვესტმინსტერის სააბატოში, თარიღი ჯერ არ გამოცხადებულა.
დედოფალს უინძორის ციხე-სიმაგრეში მეუღლის, მამის, მეფე ჯორჯ VI-ის, დედისა და დის გვერდით დაკრძალავენ.