ფინეთის თავდაცვის სამინისტროს განცხადებით, ხუთშაბათს დილით ორმა რუსულმა გამანადგურებელმა МиГ-31-მა დაარღვია მათი ქვეყნის საჰაერო სივრცე, ფინეთის ყურეში მდებარე სანაპირო ქალაქ პორვოოს მახლობლად.
ფინელი სამხედროები ინციდენტთან დაკავშირებულ გარემოებებს იკვლევენ.
თავდაცვის სამინისტროს სპიკერმა Reuters-სთან საუბრისას განაცხადა, რომ საჰაერო სივრცის დარღვევა, გრინვიჩის დროით, 06:40 საათზე მოხდა.
სპიკერის განცხადებით, რუსული გამანადგურებლები დასავლეთის მიმართულებით მიფრინავდნენ და ორი წუთის განმავლობაში იმყოფებოდნენ ფინეთის საჰაერო სივრცეში.
"ფინეთის საჰაერო სივრცის სავარაუდო დარღვევის სიღრმე იყო ერთი კილომეტრი", - დასძინა მან.
"ფინეთის საჰაერო ძალებმა თვითმფრინავების იდენტიფიცირება მოახდინეს და ფინეთის სასაზღვრო დაცვამ უკვე დაიწყო გამოძიება დარღვევის შესახებ", - ნათქვამია ფინეთის თავდაცვის სამინისტროს განცხადებაში.
ამავდროულად, გავრცელდა ცნობა, რომ რუსეთმა კალინინგრადის ოლქში "კინჟალის" ჰიპერბგერითი რაკეტებით აღჭურვილი 3 ერთეული МиГ-31 განათავსა.