ევროკომისიის გეგმას, რომელიც ბლოკის ქვეყნებში ბუნებრივი აირის მოხმარების 15%-ით შემცირებას ითვალისწინებს, მწვავე სკეპტიციზმით შეხვდნენ ესპანეთი და პორტუგალია, რომლებიც ტრადიციულად, ბრიუსელის ერთგულ მხარდამჭერებად ითვლებიან.
ლისაბონისა და მადრიდის განცხადებით, ისინი მხარს არ დაუჭერენ ევროკომისიის პრეზიდენტის ურსულა ფონ დერ ლაიენის ოთხშაბათს გამოცხადებულ ინიციატივას.
ევროკომისიის წინადადებით, გათვალისწინებულია გაზის მოხმარების 15%-ით შემცირება, თავდაპირველად ნებაყოფლობით, ხოლო ენერგეტიკის სფეროში საგანგებო ვითარების შემთხვევაში, სავალდებულოდ.
პორტუგალიისა და ესპანეთის მთავრობის წარმომადგენელთა განცხადებით, დანარჩენ ევროპასთან მათ მწირი ენერგეტიკული კავშირები აქვთ, ამასთან, ისინი ძალიან ცოტა რუსულ გაზს იყენებენ ევროკავშირის სხვა წევრებთან შედარებით, როგორიცაა გერმანია და იტალია.
"ჩვენ დავიცავთ ევროპულ ღირებულებებს, მაგრამ არ მივიღებთ მსხვერპლს იმ საკითხთან დაკავშირებით, რომელზედაც ჩვენი აზრის გამოთქმის უფლებაც კი არ მოგვცეს", - განაცხადა ესპანეთის ეკოლოგის მინისტრმა ტერეზა რიბერამ.
"რაც არ უნდა მოხდეს, ესპანურ ოჯახებს არ შეეზღუდებათ გაზი ან ელექტროენერგია თავიანთ სახლებში", - დასძინა მან.
პორტუგალიის მდივანმა გარემოს დაცვისა და ენერგეტიკის საკითხებში, ჟოაო გალამბამ თქვა, რომ შემოთავაზებული ინიციატივა არის "არამდგრადი" და "არაპროპორციული".
"პორტუგალია წლების განმავლობაში ჰქონდა არახელსაყრელი მდგომარეობა, რადგან მას არ ჰქონდა კავშირი დანარჩენი ევროპის ენერგიის გამანაწილებელ ქსელთან და ქვეყანას ყოველთვის უწევდა უფრო ძვირი გაზის ყიდვა", - თქვა მან.
შეგახსენებთ, 20 ივლისს ევროკომისიამ ევროპაში გაზის მოხმარების 15%-ით შემცირების გეგმა წარადგინა.
ევროკომისიის წინადადება ევროკავშირის ქვეყნების მყარმა უმრავლესობამ უნდა დაამტკიცოს. წინადადებას ევროკავშირის ქვეყნების ელჩები 22 ივლისს განიხილავენ, 26 ივლისს წევრი ქვეყნების ენერგეტიკის მინისტრები.
ფოტო: ესპანეთისა და პორტუგალიის პრემიერ-მინისტრები
