რუსეთის საგარეო საქმეთა სამინისტრომ საპროტესტო ნოტით მოსთხოვა ბულგარეთს, გააუქმოს რუსეთის დიპლომატიური მისიის თანამშრომელთა გაძევების გადაწყვეტილება 1-ლი ივლისის შუადღისთვის.
წინააღმდეგ შემთხვევაში მოსკოვი ბულგარეთში საელჩოს დახურვით იმუქრება.
ბულგარეთის მოქმედმა პრემიერ-მინისტრმა კირილ პეტკოვმა რუსეთს მოუწოდა, უკან გაიწვიოს ულტიმატუმი და შეინარჩუნოს დიპლომატიური არხები მოსკოვსა და სოფიას შორის.
"ჩვენ გვჯერა დიალოგის აუცილებლობისა, რისთვისაც დიპლომატიური არხების არსებობა უმნიშვნელოვანესია", - განაცხადა პეტკოვმა.
"ამიტომ ვთხოვთ რუსეთის საელჩოს, უკან გაიწვიოს გამოგზავნილი ნოტა. წარსულისა და მომავლის გამო, ჩვენ უნდა შევძლოთ წინსვლა ურთიერთპატივისცემის საფუძველზე", - თქვა პეტკოვმა.
შეგახსენებთ, 28 ივნისს ბულგარეთმა, რომელიც ევროკავშირისა და ნატოს წევრია, ჯაშუშური საქმიანობის გამო რუსეთის საელჩოს 70 თანამშრომლის გაძევების შესახებ განაცხადა.
70 თანამშრომლის გაძევების შემდეგ, სოფიაში რუსეთის მისიაში 43 თანამშრომელი გააგრძელებს მუშაობას, მაშინ როდესაც მოსკოვში ბულგარეთის მისიას მხოლოდ 12 თანაშრომელი ჰყავს.