შეერთებულმა შტატებმა, იაპონიამ, ავსტრალიამ, ახალმა ზელანდიამ და დიდმა ბრიტანეთმა წყნარ ოკეანეში პარტნიორობის ახალი მექანიზმის დაფუძნების თაობაზე განაცხადეს.
თეთრი სახლის განცხადებით, არაფორმალური ჯგუფი შექმნა მიზნად ისახავს ეკონომიკური და დიპლომატიური კავშირების გაღრმავებას წყნარი ოკეანის კუნძულოვან სახელმწიფოებთან.
ჯგუფი, სახელწოდებით "პარტნიორები წყნარ ოკეანეში"/Partners in the Blue Pacific, შეეცდება მხარი დაუჭიროს წყნარი ოკეანის რეგიონალიზმს და გააძლიეროს ეკონომიკური კავშირები წყნარი ოკეანის კუნძულებსა და დანარჩენ მსოფლიოს შორის.
"რადგან ჩვენი ქვეყნები - ავსტრალია, იაპონია, ახალი ზელანდია, გაერთიანებული სამეფო და შეერთებული შტატები - აგრძელებენ წყნარ ოკეანეში კეთილდღეობის, გამძლეობისა და უსაფრთხოების ხელშეწყობას, ჩვენ უნდა გამოვიყენოთ ჩვენი კოლექტიური ძალა უფრო მჭიდრო თანამშრომლობით", - განაცხადეს მონაწილე ქვეყნებმა ერთობლივ განცხადებაში.
დოკუმენტში აღნიშნულია, რომ მხარეები "გააღრმავებენ თანამშრომლობას ისეთ სფეროებში, როგორიცაა კლიმატი, კომუნიკაციები და ტრანსპორტი, საზღვაო უსაფრთხოება და დაცვა, ჯანმრთელობა, კეთილდღეობა და განათლება".
ასევე ნათქვამია, რომ ახალი მექანიზმი ყალიბდება "წესებზე დაფუძნებულ თავისუფალ და ღია საერთაშორისო წესრიგზე მზარდი ზეწოლის ფონზე".
თეთრი სახლის ინდო-წყნარი ოკეანის კოორდინატორმა კურტ კემპბელმა განაცხადა, რომ შეერთებულ შტატებს სჭირდებოდა მეტი დიპლომატიური საშუალებები რეგიონში და მეტი კონტაქტი წყნარი ოკეანის კუნძულოვან ქვეყნებთან, რომლებსაც ზოგჯერ "ნაკლები ყურადღება ექცევა".