21 იანვარს შეერთებული შტატების კონგრესის წარმომადგენელთა პალატის საგარეო საკითხთა კომიტეტის თავმჯდომარემ, გრეგორი მიქსმა წარადგინა კანონპროექტი, უკრაინაში შეჭრის შემთხვევაში, რუსეთის წინააღმდეგ მკაცრი სანქციების დაწესების თაობაზე.
გრეგორი მიქსის კანონპროექტი დაახლოებით იგივე სადამსჯელო ზომებს მოიცავს, რასაც რამდენიმე დღით ადრე, სენატში, სენატის საგარეო საკითხთა კომიტეტის თავმჯდომარის, რობერტ მენენდესის მიერ წარდგენილი კანონპროექტი.
გრეგორი მიქსის კანონპროექტი წარმომადგენელთა პალატაშია წარდგენილი, ხოლო მენენდესისა - სენატში.
გრეგორი მიქსის კანონპროექტი ითვალისწინებს სადამსჯელო ზომებს "ჩრდილოეთის ნაკადი 2"-ისა და რუსეთის ფინანსური ინსტიტუტების მიმართ, მათ შორის არიან: "ალფა ბანკი", "ვითიბი ბანკი", "გაზპრომბანკი", "მოსკოვის საკრედიტო ბანკი", "რუსეთის პირდაპირი ინვესტიციების ფონდი", "სბერბანკი" და სხვა.
კანონპროექტი ითვალისწინებს სანქციებს რუსეთის პრეზიდენტის ვლადიმირ პუტინისა და რუსეთის სხვა ლიდერების წინააღმდეგ.
გარდა ამისა, კანონპროექტში შემოთავაზებულია უკრაინისთვის აშშ-ის სამხედრო დახმარების გაზრდა.
"შეერთებულმა შტატებმა და მისმა ტრანსატლანტიკურმა მოკავშირეებმა ნათლად უნდა აუწყონ მოსკოვს, რომ ნებისმიერ ქმედებას, რომელიც წარმოადგენს რუსეთის სამხედრო ძალების სუვერენულ ტერიტორიაზე შეჭრას, მძიმე შედეგები მოჰყვება", - აცხადებს კონგრესმენი მიქსი.
მანამდე, წარმომადგენელთა პალატას კონგრესმენმა ჯიმ ბენქსმა წარუდგინა რუსეთის წინააღმდეგ მკაცრი სანქციების კანონპროექტი.
გარდა ამისა, რუსეთის წინააღმდეგ სანქციების კანონპროექტები წარდგენილია სენატში, რესპუბლიკელი სენატორის მარკო რუბიოს მიერ და დემოკრატი სენატორის რობერტ მენენდესის მიერ.
მედიის ინფორმაციით, თეთრი სახლი მხარს უჭერს მენენდესის კანონპროექტს, რომელიც მოიცავს სანქციებს რუსეთის პრეზიდენტ პუტინის, პრემიერ-მინისტრ მიხაილ მიშუსტინის, საგარეო საქმეთა მინისტრ სერგეი ლავროვის, თავდაცვის მინისტრ სერგეი შოიგუს წინააღმდეგ.
კანონპროექტს გამოეხმაურა კრემლი, რომლის განცხადებითაც, რუსეთის უმაღლესი თანამდებობის პირებისთვის სანქციების დაწესება, რუსეთ-ამერიკის ურთიერთობების გაწყვეტას გამოიწვევს.
