14 იანვარს, შეერთებული შტატების რესპუბლიკელმა სენატორმა მარკო რუბიომ სენატში წარადგინა სანქციების ახალი კანონპროექტი მოსკოვის წინააღმდეგ, უკრაინაში სამხედრო აგრესიის შემთხვევაში.
კანონპროექტი ითვალისწინებს სანქციების დაწესებას რუსეთის პრეზიდენტ ვლადიმირ პუტინისა და მისი გარემოცვის წინააღმდეგ.
პროექტის თანახმად, ამერიკის დაზვერვას ყოველ 20 დღეში ერთხელ კონგრესისთვის მოხსენების წარდგენა მოუწევს, დაარღვია თუ არა რუსეთმა უკრაინის ტერიტორიული მთლიანობა.
თუ რუსეთის ფედერაცია უკრაინაში შეიჭრება, აშშ-ის პრეზიდენტი ვალდებული იქნება 10 დღის განმავლობაში რუსეთის ხელისუფლების წინააღმდეგ სანქციები დააწესოს. კერძოდ, დაბლოკოს პუტინის, ასევე რუსეთის პრემიერ-მინისტრის, თავდაცვის მინისტრის, რუსი ოლიგარქებისა და მათ ოჯახების აქტივები და ამერიკაში შესვლის შესაძლებლობა.
"მოვუწოდებ ჩემს კოლეგებს სენატიდან, ითანამშრომლონ და დაამტკიცონ კანონპროექტი, სანამ ჯერ კიდევ არ არის გვიანი", - განაცხადა მარკო რუბიომ. მანამდე მან ტვიტერზე დაწერა, რომ "თითქმის, ეჭვგარეშეა, პუტინი ძალიან მალე ეცდება უკრაინის ზოგიერთი ნაწილის ოკუპაციას".
ერთი დღით ადრე, სენატმა უარყო რესპუბლიკელი სენატორის ტედ კურზის სანქციების კანონპროექტი, რომელიც მიზნად ისახავდა "ჩრდილოეთის ნაკადი 2"-ის სანქცირებას.
შეგახსენებთ, სენატში წარდგენილია ალტერნატიული კანონპროექტი "უკრაინის სუვერენიტეტის დაცვის აქტი", რომელიც უკრაინაში შეჭრის შემთხვევაში, რუსეთის წინააღმდეგ, სანქციებს ითვალისწინებს. კანონპროექტი საგარეო საქმეთა კომიტეტის თავმჯდომარის დემოკრატი სენატორის რობერტ მენენდესის ინიციატივით მომზადდა.
მედიის ინფორმაციით, თეთრი სახლი მხარს უჭერს მენენდესის კანონპროექტს, რომელიც მოიცავს სანქციებს რუსეთის პრეზიდენტ პუტინის, პრემიერ-მინისტრ მიხაილ მიშუსტინის, საგარეო საქმეთა მინისტრ სერგეი ლავროვის, თავდაცვის მინისტრ სერგეი შოიგუს წინააღმდეგ.
კანონპროექტს გამოეხმაურა კრემლი, რომლის განცხადებითაც, რუსეთის უმაღლესი თანამდებობის პირებისთვის სანქციების დაწესება, რუსეთ-ამერიკის ურთიერთობების გაწყვეტას გამოიწვევს.
