შეერთებული შტატების წარმომადგენელთა პალატის რესპუბლიკელმა წევრმა ჯიმ ბენქსმა წარადგინა კანონპროექტი რუსეთის წინააღმდეგ სანქციების დაწესების თაობაზე, რომელიც სხვათა შორის, მოიცავს მკაცრ სადამსჯელო ზომებს ვლადიმირ პუტინის ახლო გარემოცვის მიმართ.
კონგრესის ვებგვერდზე დოკუმენტის შინაარსი ჯერ არ გასაჯაროვებულა, თუმცა ამერიკულმა გამოცემა Washington Post-მა მოიპოვა და გამოაქვეყნა დოკუმენტის ტექსტი.
კანონპროექტის წარმდგენია 38 კონგრესმენი.
ინიციატორები მოითხოვენ რუსეთის ფედერაციის "ტერორიზმის სპონსორად" გამოცხადებას და დონბასში რუსეთის მიერ მხარდაჭერილი უკრაინის სეპარატისტული რეგიონების ტერორისტულ ორგანიზაციებად აღიარებას.
გარდა ამისა, დოკუმენტი ითვალისწინებს სანქციებს "ჩრდილოეთის ნაკადი 2"-ის გაზსადენის წინააღმდეგ.
ამასთან, კანონპროექტით გათვალისწინებულია ვლადიმირ პუტინის ახლო გარემოცვის 35 წევრის სანქცირება, როგორც ხელისუფლების ასევე ბიზნეს წრეებიდან.
საუბარია ოლიგარქებზე რომან აბრამოვიჩზე, ალიშერ უსმანოვზე, ოლეგ დერიპასკაზე, გენადი ტიმჩენკოზე, გაზპრომის ხელმძღვანელ ალექსეი მილერზე, როსნეფტის დირექტორზე იგორ სეჩინსა და სხვებზე.
გარდა ამისა, სანქციები გათვალისწინებულია პრემიერ-მინისტრ მიხაილ მიშუსტინის, კრემლის პრესმდივან დმიტრი პესკოვის, რუსეთის ფედერალური უსაფრთხოების სამსახურის ხელმძღვანელის ალექსანდრ ბორტნიკოვის, უშიშროების საბჭოს მდივნის ნიკოლაი პატრუშევის, მოსკოვის მერის სერგეი სობიანინის, საგამოძიებო კომიტეტის ხელმძღვანელის ალექსანდრ ბასტრიკინის, პრეზიდენტის ადმინისტრაციის ხელმძღვანელის ანტონ ვაინოს, მისი პირველი მოადგილის სერგეი კირიენკოს, ცენტრალური საარჩევნო კომისიის ხელმძღვანელის ელა პამფილოვას და ეროვნული გვარდიის დირექტორის ვიქტორ ზოლოტოვის მიმართ.
პოტენციურად სანქცირებულთა სიაში ასევე შედიან რუსეთის პირველი არხის აღმასრულებელი დირექტორი კონსტანტინ ერნსტი, ტელე და რადიო წამყვანი ვლადიმირ სოლოვიოვი და Russia Today-ის მთავარი რედაქტორი მარგარიტა სიმონიანი.
გამოცემა Washington Post-ის ცნობით, დოკუმენტის ავტორები გამოდიან მოწოდებით, რომ ეს სანქციები დაწესდეს რუსეთის უკრაინაში შესაძლო შეჭრამდე და არ დაელოდონ მოვლენების ამგვარ განვითარებას.