მას შემდეგ, რაც მსოფლიოში კორონავირუსის კიდევ ერთი ახალი შტამი - „ომიკრონი“ დადასტურდა, შეზღუდვების გამკაცრება კვლავ დღის წესრიგში დადგა. საკოორდინაციო საბჭომ მიიღო გადაწყვეტილება, ღამის კლუბები არ გახსნილიყო, რასაც კლუბის წარმომადგენლების და საზოგადოების ნაწილის პროტესტი მოჰყვა.
მაშინ, როცა საქართველოში ამ გადაწყვეტილებას აპროტესტებდნენ, ევროპის ქვეყნებს რიგი შეზღუდვები უკვე დაბრუნებული ჰქონდა და ზოგიერთი მათგანი რეგულაციების გამკაცრებას მომდევნო დღეებში ელოდებოდა.
მოდით, კიდევ ერთხელ გადავხედოთ და ვნახოთ, როგორ ხვდება „ომიკრონის“ გავრცელებას ევროპის დიდი ნაწილი.
შოტლანდია 27 დეკემბრიდან ღამის კლუბებს, სულ მცირე, 3 კვირით დახურავს. რამდენიმე დღის წინ კი, „ომიკრონის“ გავრცელების გამო, დიდი ღონისძიებები აკრძალა.
ღამის კლუბები დაიხურა გერმანიაშიც. შეკრებებს რაც შეეხება, ის მხოლოდ 10 ადამიანზე განისაზღვრა. გადაწყვეტილება ქვეყნის ხელისუფლებამ კორონავირუსის მეხუთე ტალღის გამო მიიღო. დიდი ღონისძიებები, როგორიცაა საფეხბურთო მატჩები, პუბლიკის გარეშე ჩატარდება. ახალი რეგულაციები ძალაში 28 დეკემბრიდან შევა.
შეზღუდვები შეეხო ჩეხეთს. პაბები, კაფეები, რესტორნები და კლუბები მცირე შეზღუდვებით მუშაობენ. თუმცა, „ომიკრონის“ გავრცელების შემდეგ, ქვეყანაში კლუბები დაიხურა.
ფინეთში ბარების და რესტორნების უმრავლესობა ღიაა როგორც გარეთ, ისე შიგნით. ღამის კლუბები დახურულია „შესაბამის შეტყობინებამდე“.
საფრანგეთში წლის ბოლომდე ყველა კლუბი დაიხურა. ამჟამად დახურულია კლუბები საბერძნეთში.
გამონაკლისი არც იტალია აღმოჩნდა. რესტორნები და ბარები გარკვეული წესების დაცვის ფუნქციონირებენ, ხოლო ღამის კლუბები „შემდგომ შეტყობინებამდეა“ დახურული.
ლუქსემბურგის მთავრობამ, საფრანგეთის და ბელგიის მსგავსი გადაწყვეტილება მიიღო და ქვეყანაში კლუბები დახურულია.
ნიდერლანდებში ღამის კლუბები დახურულია, ანალოგიური ვითარებაა პოლონეთში 15 დეკემბრიდან, ასევე - პორტუგალიაში.
რაც შეეხება საქართველოს - პროტესტი გრძელდება. ღამის კლუბების წარმომადგენლები ამბობენ, რომ ხელისუფლება მათ მიზანმიმართულად ანადგურებს, საბაბად კი პანდემიას იყენებს. კლუბ „ბასიანის“ დამფუძნებლის ნაჯა ორაშვილის განცხადებით, ახლა ფიზიკურად არის გადასარჩენი ეს სივრცეები და თავისუფლების აღკვეთადაც რომ დაუჯდეს, მზად არის, წავიდეს ციხეში, ვიდრე უსამართლობას შეეგუოს.
