ალერგოლოგ-იმუნოლოგი ბიძინა კულუმბეგოვი ვაქცინაციის საწინააღმდეგოდ განწყობილ სასულიერო პირებს თხოვნით მიმართავს, რომ ხელი არ შეუშალონ ვაქცინაციის პროცესს. ამის შესახებ მან ტელეკომპანია "ფორმულას" ეთერში ისაუბრა.
კულუმბეგოვის თქმით, ერთ-ერთი წამყვანი კლინიკის უმცროსი სამედიცინო პერსონალის უდიდესმა ნაწილმა ვაქცინაციაზე თავშეკავების მიზეზად მოძღვრის რჩევა დაასახელეს.
"ერთ-ერთი წამყვანი კლინიკის მაგალითი ვიცი, როდესაც ითხოვა ხელმძღვანელმა თანამშრომელთაგან, რომ უბრალოდ არგუმენტირებული პასუხი მჭირდება თქვენგან, თუ რატომ იკავებთ თავს ვაქცინაციისგან, უდიდესმა ნაწილმა, დაახლოებით 20-23 უმცროსმა სამედიცინო პერსონალმა დაასახელა, რომ მამაო გვეუბნება, თავი შეიკავეთ ვაქცინაციისგანო.
ჩვენ გვაქვს თხოვნა, პოზიცია გასაგებია, რომ სამედიცინო საკითხია და აქ არის პედალირება, რომ ჩვენ [ეკლესია] ვერ მოვუწოდებთ ვაქცინაციისკენ, ესეც არ მიმაჩნია სწორად, მაგრამ დავუშვათ, რომ ასეა ეს. ვთხოვთ, რომ ხელი მაინც არ შეუშალონ პროცესს. ამიტომ თუ ინფორმაციას ბოლომდე ვერ ფლობენ, უჭირთ გარკვევა, სად გადის ზღვარი ჭეშმარიტებასა და სიცრუეს შორის, გთხოვთ, ექიმებს მოგვანდეთ.
ყველაზე სწორი პოზიცია იქნება, რომ ვაქცინაცია არის სიცოცხლის გადამრჩენი ღონისძიება და ისინი უნდა იდგნენ ამის მხარეს. აიათოლა ხამენეიც კი აიცრა, ირანის სულიერი ლიდერი და მის ქვეყანას მაგალითი მისცა და მუსულმანურ სამყაროს. და ეს თუ ვერ ხერხდება ამ ქვეყანაში ბევრი სხვადასხვა მიზეზის გამო, ხელი მაინც არ შეუშალონ ვაქცინაციის კამპანიას, ეს იქნება უმორჩილესი თხოვნა", - განაცხადა კულუმბეგოვმა.
