ამ დროისთვის თავისუფალია 2 485 საწოლი - აცხადებს ჯანდაცვის მინისტრის მოადგილე თამარ გაბუნია. მისი განმარტებით, კლინიკებში პაციენტების რაოდენობა 3 000-ს აღწევს.

„მოგეხსენებათ ბოლო ორი დღის განმავლობაში კიბერშეტევის გამო ხარვეზებით მუშაობდა პორტალი, დღეს ახალი შემთხვევების მაჩვენებელი დაჯამდა და ამდენად შემთხვევების რაოდენობა გარკვეულწილად უფრო მაღალია, რაც ყოველდღიურ მაჩვენებლებს, ჭეშმარიტ მაჩვენებლებს არ ასახავს, თუმცა მაინც შემთხვევების რაოდენობა ათასს აღემატება, რაც რა თქმა უნდა, საყურადღებო მაჩვენებელია. მნიშვნელოვანია, კლინიკებში პაციენტების რაოდენობა, რომელიც 3 000-ს აღწევს, 2 961 იყო დილის მდგომარეობით, აქედან 658 პაციენტი ინტენსიური თერაპიის განყოფილებაში, 167 არის რეანიმაციის განყოფილებაში და თავისუფალი ამ დროისთვის რჩება 2 485 საწოლი. რა თქმა უნდა, ჰოსპიტალური სექტორი რჩება მობილიზებულ მდგომარეობაში იმისთვის, რომ შემთხვევების მართვა მოხდეს შესაბამისად“, - განაცხადა გაბუნიამ.