საქართველოს ეკონომიკისა და მდგრადი განვითარების მინისტრის, ნათია თურნავა მიიჩნევს, რომ ინფლაცია ძირითადად იმპორტული პროდუქციის გამო ფიქსირდება.
მისივე თქმით, ლარის კურსი მყარდება და იმპორტულ საქონელზე ფასის ზრდაც შემცირდება.
"ინფლაცია, ფასების ზრდა რჩება სერიოზულ გამოწვევად. ინფლაცია, ძირითადად, იმპორტული პროდუქციის გამო ფიქსირდება. ამას აქვს მიზეზები. პირველი და მთავარი ისაა, რომ წლის დასაწყისში ლარი გაუფასურდა. ამ მხრივ, პრობლემა მეტნაკლებად აღმოფხვრილია, ლარის კურსი სტაბილურდება და მყარდება და ეს ნიშნავს, ასეთ იმპორტულ საქონელზე ამ მიზეზის გამო გამოწვეული ფასის ზრდა შემცირდება. მეორე მიზეზია მსოფლიო ბაზარზე ფასების ზრდა ისეთ პროდუქტებზე, როგორიცაა, მაგალითად, ნავთობპროდუქტები", - განაცხადა ეკონომიკისა და მდგრადი განვითარების მინისტრმა ნათია თურნავამ ჟურნალისტებთან საუბრისას.
ნათია თურნავამ ასევე აღნიშნა, რომ საქართველო იწყებს ახალ პროგრამას, რომელიც შეეხება იმპორტის ჩანაცვლებას და ამისთვის ადგილობრივი წარმოების წახალისებას.
"ჩვენ ვიწყებთ ახალ პროგრამას, რომელიც შეეხება იმპორტის ჩანაცვლებას და იმპორტის ჩამნაცვლებელი ადგილობრივი წარმოებების წახალისებას სპეციალური პროგრამებით - ეს იქნება სუბსიდია და გრანტები. ყველგან, სადაც გვაქვს პოტენციალი, რომ თვითონ ვაწარმოოთ და იმპორტული საქონელი შევამციროთ ბაზარზე, სწორედ ასე მოხდება",|- განაცხადა ნათია თურნავამ.
