თბილისის შიდსისა და ინფექციური პათოლოგიების ცენტრის დირექტორის თენგიზ ცერცვაძის განცხადებით, კორონავირუსის დელტა შტამის სიმპტომები არ არის სხვა ვარიანტებისგან განსაკუთრებით განსხვავებული, თუმცა პაციენტებს რამდენიმე მკვეთრად გამოხატული სიმპტომი ახასიათებთ. ამის შესახებ ცერცვაძემ "ღამის კურიერის" ეთერში განაცხადა.
ცერცვაძის თქმით, დელტა შტამი სხვა შტამებთან შედარებით, გაცილებით სწრაფად გადამდებია და დაავადების უფრო მძიმე ფორმებს იწვევს.
"დელტა შტამს ახასიათებს სურდო, წყალისებური სურდო, ცხვირიდან მეტი გამონადენი, მეტად ახასიათებს თავის ტკივილი, მეტად ახასიათებს ჩვეულებრივი გრიპის სიმპტომატიკა - უფრო მეტად, ვიდრე სხვა შტამებით გამოწვეულ კოვიდს. მაგრამ, ეს განსხვავება არ არის ისეთი თვალსაჩინო, რომ მარტო ამით დიაგნოზი დაისვას," - აცხადებს თენგიზ ცერცვაძე.
