ხვალ, 26 მაისს, ევროპული საქართველო, რუსთაველის მეტროსთან, დამოუკიდებლობის დღისადმი მიძღვნილ ღონისძიებას გამართავს.
პარტიის ერთ-ერთი ლიდერის, გიორგი კანდელაკის თქმით, ღონისძიებაზე წარმოდგენილი იქნება სხვადასხვა ეპიზოდი, ფიგურა, ცნობილი და ნაკლებად ცნობილი ფაქტები პირველი რესპუბლიკის ცხოვრებიდან.
კანდელაკის თქმით, გამვლელებს ექნებათ შესაძლებლობა სიმბოლურად გადაიღონ სურათი თავისუფლების ქანდაკების მულიაჟთან და მიიღონ საჩუქრად მარო მაყაშვილისა და ექვთიმე თაყაიშვილის გამოსახულებიანი მაისურები. ღონისძიება 10.00 დან 13.00 მდე გაგრძელდება.
„26 მაისს, რუსთაველის მეტროსთან, ევროპული საქართველო გამართავს ღონისძიებას, გამოფენას დამოუკიდებლობის დღისადმი მიძღვნილს, სადაც წარმოდგენილი იქნება შედარებით ცნობილი და ნაკლებად ცნობილი ეპიზოდებიც, ფიგურებიც ჩვენი სამწლიანი, სამწუხაროდ ასე ხანმოკლე დამოუკიდებლობის პერიოდიდან. ამავე დროს, გამვლელებისათვის იქნება შესაძლებლობა, რომ სიმბოლურად გადაიღონ სურათი თავისუფლების ქანდაკების მულიაჟთან, რადგან სულისკვეთება ჩვენი პირველი რესპუბლიკის სწორედ ეს იყო, თავისუფალი სამყაროს ნაწილად გახდომა და ვინც გადაიღბს სურათს, ექნება შესაძლებლობა მიიღოს საჩუქრად მაისური მარო მაყაშვილისა და ექვთიმე თაყაიშვილის გამოსახულებით, როგორც საზოგადოებისათვის შედარებით უფრო მეტად ცნობილი ფიგურებისა საბჭოთა ოკუპაციის წინააღმდეგ და თავისუფლების ბრძოლის.
ჩვენ მომავალში ვაპირებთ, რომ გავარგძელოთ ეს სერია, მათ შორის მაისურების და სხვადასხვა გზით უფრო ნაკლებად ცნობილი ფიგურების პოპულარიზაციაც მოვახდინოთ და რათქმაუნდა, მეტროსთან ასევე იქნება პატარა გამოფენა, სადაც იქნება ასახული შედარებით ნაკლებად ცნობილი მომენტებიც, მაგრამ მნიშვნელოვანი მომენტები ჩვენი პირველი რესპუბლიკის ცხოვრებიდან.“ - განაცხადა კანდელაკმა.
