შეერთებული შტატები რუსეთის წინააღმდეგ ახალი სანქციებს დღეს გამოაცხადებს. იუწყება Reuters-ი ანონიმურ წყაროზე დაყრდნობით.
გავრცელებული ინფორმაციით, სანქციები რუსეთის მიერ აშშ-ის საპრეზინდენტო არჩევნებში ჩარევასა და ამერიკის სამთავრობო უწყებებზე განხორციელებულ კიბერთავდასხმებს უკავშირდება.
სანქცირებულთა სიაში იქნებიან როგორც ფიზიკური, ასევე იურიდიული პირები. ვარაუდობენ, რომ 30-მდე რუსული ორგანიზაცია მოხვდება შავ სიაში, ხოლო აშშ-დან გააძევებენ 10 პირს.
სხვა წყაროების ცნობით, შეერთებულმა შტატებმა შესაძლოა გამოაცხადოს ზომები, რომელიც შეზღუდავს რუსეთის საგარეო ვალს.
Wall Street Journal-ი იუწყება, რომ 14 ივნისის შემდეგ ამერიკული დაწესებულებები ვეღარ შეძლებენ რუსეთის ცენტრალური ბანკისგან, რუსეთის ფინანსთა სამინისტროსგან და ეროვნული კეთილდღეობის ფონდისგან ობლიგაციების ყიდვას.
სააგენტო Bloomberg-მა კი გაარკვია, რომ აშშ სანქციების დაწესებას რუსეთის 12 მოქალაქისა და 20 რუსული ორგანიზაციის წინააღმდეგ აპირებს. მოსკოვის მხრიდან 2020 წლის საპრეზიდენტო არჩევენბში ჩარევის მცდელობების, ავღანეთში ამერიკელი სამხედროების წინააღმდეგ თალიბანთან ერთად ერთობლივი მოქმედებებისა და მასშტაბური კიბერთავდასხმის გამო, რომელიც აშშ-ს რამდენიმე სახელმწიფო ორგანოს, აშშ-ის შინაგანი უსაფრთხოების დეპარტამენტს, სახელმწიფო დეპარტამენტს, ვაჭრობისა და სახაზინო დეპარტამენტებს შეეხო, ქვეყნიდან, შესაძლოა, 10 რუსი დიპლომატიც გააძევონ.
შეგახსენებთ, გასული წლის დეკემბერში გავრცელდა ინფორმაცია, რომ ამერიკის ფედერალურ სააგენტოებზე მასშტაბური კიბერთავდასხმა განხოციელდა. ამერიკელმა მაღალჩინოსნებმა განაცხადეს, რომ თავდასხმის უკან რუსეთი იდგა.
ჰაკერებმა სამთავრობო უწყებებში შესაღწევად ამერიკული ტექნოლოგიური კომპანია "სოლარუინდსი" (SolarWinds Corp) გამოიყენეს. ორგანიზაციებში შეჭრა ამ კომპანიის პროგრამულ განახლებასთან ერთად მოხდა.
ჰაკერები შეიჭრნენ ფედერალური, შტატის და ადგილობრივი მთავრობების, ისევე როგორც კრიტიკული ინფრასტრუქტურის და სხვა კერძო სექტორის ორგანიზაციების კომპიუტერულ სისტემებში
