თრომბის იშვიათი შემთხვევებით გამოწვეული შეშფოთების ფონზე, დანიამ ასტრაზენეკას ვაქცინის გამოყენება სრულად შეწყვიტა. დანია პირველი ევროპული ქვეყანაა, რომელმაც სრულად შეწყვიტა ასტრაზენეკას პრეპარატის გამოყენება.
გავრცელებული ინფორმაციით, ასტრაზენეკას პრეპარატის გამოყენების შეწყვეტა რამდენიმე კვირით შეაფერხებს ქვეყანაში იმუნიზაციის პროგრამის განხორციელებას.
დანიის ჯანდაცვის ეროვნული მარეგულირებლის განცხადებით, კვლევებმა აჩვენეს, რომ თრომბის შემთხვევები მოსალოდნელზე მაღალი აღმოჩნდა, დაახლოებით 40 000 ადამიანიდან ერთ შემთხვევაში.
დანიაში დაახლოებით ერთი მილიონი ადამიანია ვაქცინირებული. მათგან დაახლოებით 150 000 ადამიანი ასტრაზენეკას ვაქცინით აიცრა. ქვეყანაში ასევე გამოიყენება ფაიზერისა და მოდერნას ვაქცინები.
გასულ კვირას, ევროპის მედიკამენტების სააგენტომ განაცხადა, რომ ასტრაზენეკას ვაქცინასა და ვაქცინირებულ ადამიანებში თრომბის ძალიან იშვიათად შემთხვევებს შორის კავშირი არსებობს, თუმცა სარგებელი კვლავ აღემატება გვერდითი ეფექტებით გამოწვეულ რისკებს.
ევროკავშირის მარეგულირებელმა დაასკვნა, რომ თრომბის საშიშროება უნდა შევიდეს ვაქცინის იშვიათი გვერდითი მოვლენების ჩამონათვალში.
მანამდე თრომბის შემთხვევების გამო, რამდენიმე ევროპულმა ქვეყანამ შეაჩერა ასტრაზენეკას გამოყენება, თუმცა მოგვიანებით კვლავ განაახლეს. ზოგიერთმა ქვეყანაში 30 წლამდე ახალგაზრდებს ასტრაზენეკას ნაცვლად ალტერნატიულ ვაქცინას შესთავაზებენ. ზოგან კი მხოლოდ 55+ მოქალაქეების ასაცრელად გამოიყენება.
სამშაბათს, შეერთებულმა შტატებმა, კანადამ და ევროკავშირმა შეაჩერეს Johnson & Johnson-ის ვაქცინის გამოყენება, ასევე, თრომბის იშვიათი შემთხვევების გამო.
Johnson & Johnson-ის ვაქცინის გამოყენება შეაჩერა სამხრეთ აფრიკამაც, მიუხედავად იმისა, რომ ეს ვაქცინა ვირუსის ე.წ. სამხრეთაფრიკული შტამის მიმართ მაღალი ეფექტურობით გამოირჩეოდა.