"შეერთებული შტატები მტკიცე მხარდაჭერას უცხადებს კიევს, მაგრამ გადაწყვეტილება უკრაინის ნატოში გაწევრიანების შესახებ ჩრდილოატლანტიკურმა ალიანსმა უნდა მიიღოს", - ამის შესახებ თეთრი სახლის პრესსპიკერმა, ჯენ ფსაკიმ ჟურნალისტის მიერ დასმული შეკითხვის საპასუხოდ განაცხადა.
"ეს [ნატოში გაწევრიანება] უკრაინელების მისწრაფებაა უკვე გარკვეული ხანია. ჩვენ დიდი ხანია განვიხილავთ ამ მისწრაფებას. შეერთებული შტატები მტკიცედ უჭერს მხარს უკრაინას და მათთან ერთად ჩართულები ვართ. მაგრამ ეს გადაწყვეტილება ნატომ უნდა მიიღოს", - თქვა ფსაკიმ.
მანამდე უკრაინის პრეზიდენტმა ვოლოდიმირ ზელენსკიმ ნატოს გენერალურ მდივან იენს სტოლტენბერგთან საუბრისას თქვა, რომ კიევისთვის ყველაზე აქტუალური საკითხია ნატოს წევრობის სამოქმედო გეგმის მიღება (MAP).
"ჩვენ მზად ვართ უკრაინის არმიისა და თავდაცვის სექტორის რეფორმირებისთვის, მაგრამ მხოლოდ რეფორმები ვერ შეაკავებენ რუსეთს. ნატო არის ერთადერთი გზა აღმოსავლეთ უკრაინაში ომის დასამთავრებლად. MAP იქნება ნამდვილი სიგნალი რუსეთისთვის", - განაცხადა ზელენსკიმ.
კრემლი უმალვე გამოეხმაურა ზელენსკის ამ განცხადებას და აღნიშნა, რომ უკრაინის ნატოში გაწევრიანება კიდევ უფრო მეტად დაამძიმებს ვითარებას.
"ღრმად გვეპარება ეჭვი, რომ ნატოში გაწევრიანება უკრაინას შიდა პრობლემების გამკლავებაში დაეხმარება. ვფიქრობთ, რომ ეს კიდევ უფრო დაამძიმებს ვითარებას", - თქვა კრემლის პრესსპიკერმა, დმიტრი პესკოვმა.